Inuussutissarsiutinik nutaanik aallartisaanissamut periarfissiisut
Unammisitsineq atserneqarsimavoq 'Startup Greenland', kikkullu tamarmik peqataanissaminnut periarfissaqarput. Peqataasut suliniutiminnik saqqummiinnginnerini inuussutissarsiummik ingerlataqartut ilitsersuinissaminnut piareersimassapput.
- Niuernermik Ilinniarfimmi atuartut illoqarfimmiullu inuussutissarsiortunut pitsaalluinnartunik siunnersuutissaqartut naapittarpakka. Isumassarsialli pilerneranit piviusunngortinnissaanut ungasissinnaasarpoq, peqataasullu takorluukkaminnik piviusunngortitsinissaannut periarfissikkumallugit matumani aaqqissuussineq pilersipparput, Lars Møller Kranker, aningaasaqarnermik aallarnisaanermillu ilinniartitsisuusoq oqaluttuarpoq.
Startup Weekend, danskit aallarnisaasut inuusuttut sisamat peqataaffigalugu Londonimi OL sioqqutilaarlugu ajugaaffigisaat, isumassarsiorfigimavaa. Ajugaasut ilaat, Kasper Pihl Tornø, naliliisuujartorluni siunnersortaajartorlunilu Nuummut aamma tikissaaq.
Unammisitsineq Niuernermik Ilinniarfimmi aqagu nal. 17.00 aallartissaaq sapaatiuppallu ualikkut naammassineqassalluni. Peqataasut naliliisartunit nunatsinneersunit siunnersorneqarnissaminnik noqqaasinnaapput, tassaasut Air Greenlandimi pisortaaneq Michael Binzer, BankNordikimi pisortaq Bjartur Nolsøe, Mittarfeqarfinni pisortaaneq Jens Lauridsen aamma Nuuk FM-imi tuniniaanermut pilerisaarinermullu pisortaq Claus Nissen.
- Peqataasut isumassarsiamik aningaaserivimmut aningaasaliisussamulluunniit allamut saqqummiunnissaanut tulluussarlugu suliffeqarfimmut pilersaarusiorlutillu najoqqutassiussapput. Peqataasut aamma isumassarsiamik qanoq ilillugu soqutiginarsarnissaanut siunnersorneqassapput. Naliliisartoqatigiittaaq misilittakkaminnik tunniussaqarnissaminnut piareersimassapput, Lars Møller Kranker oqarpoq.
Unammisitsinermi ajugaasumut 10.000 koruuninik akissarsiassaqassaaq, aammalu 2-nngortumut 3-nngortumullu akissarsititsisoqarumaarluni.
Suliaqarfiit soorlit sammineqarnissaannut immikkut killiliussaqartoqarsimanngilaq.
- Eqqumiitsuliornermit aatsitassarsiornermi kiffartuussinermut toqqaasoqarsinnaavoq, Lars Møller Kranker oqarpoq.
Inuussutissarsiortut arlariit aningaasaliissuteqarnerisigut unammisitsinerup aqagu ualinerani aallartinnissaa qulakkeerneqarpoq.
Startup Greenland paasissutissanik aallerfigineqarsinnaasumik aamma facebookimi qupperneqarpoq.
