Inuussutissarsiutinik ilinniarlutik unitsitsisartut ikiliartorput
Ilinniagaqartut ilinniakkaminnik taamaatitsisut piffissami 2004-imit 2008-imut agguaqatigiissillugu ukiumut 522-inik amerlassuseqarput, siornali 2008-imi ilinniagaqartut 478-it ilinniakkaminnik unitsitsisut amerlassuseqarlutik.
Tunngavisumik inuussutissarsiutitigut ilinniagaqartut ilinniakkaminnik taamaatitsisut akornani amerlanersaapput, siorna 2008-mi 289-it ilinniakkaminnik taamaatitsigamik naatsorsueqqissaartarfiup kisitsisit saqummiussaani tamanna takuneqarsinnaavoq. Maannalu suliniuteqartoqarneratigut ilinniakkaminnik taamatitsisut ikiliartorput.
Ilinniartitaanermut Naalakkersusioqarfik ukiuni kingullerni sisamani ilinniagaqartut taamatittartut ikilisinneqarnissaannik suliniutinut aningaasaliisarpoq siorna ukiormannalu suliniutinut 4 millioner koruuninik aningaasaliivoq, ilinniagaqarfiit qinnuteqarnerisa kingorna.
Sanaartornermut ilinniarfiup Sisimiuniittup ilinniartunut najugaqarfia ilinniartunut siunnersortimik oqaloqatiginnittartumik atorfinititsivoq, ilinniartut ilinniakkaminnik taamaatitsinngissaat anguniarlugu.
Ilinniartitaanermut naalakkersuisoqarfik ilinniagaqartut taamatittarnerisa ikilisinneqarnissaannut suliniutinut aningaasaliinissanut aalajangiisartunik pilersitsivoq, taannna ilinniagaqarfinnit assigiinngitsunit ilaasortaqartumik.