Inuussutissarsiortut uuliasiorneq aningaasarsiorfigerusuppaat

Nunatsinni suliffeqarfiit suleqatigiinnermikkut uuliasiornerup nunatsinni isertitsilluarnerunissaa aamma atugarissaarnermut aningaasanik isumannaarinissaa qulakkeerniarpaat.
Allattoq Carla Davidsen
oktobarip 18-at 2012 06:55

EMJ-Atcon, Permagreen aamma MT Højgaard suleqatigiinnissamik ukiup aappaa avillugu matuma siornagut isumaqatigiipput, aatsitassarsiornermik uuliasiornermillu ingerlatsinerni annertuuni sumiiffimmiittut peqataanissaannik aqqutissiuussisussamik.

Sumiiffimmi suliffeqarfiit peqataasut amerlineqarput. Tassalu tamanna isumaqarluni Aqqartartut MASIK, Arssarnerit A/S, Brøndum Grønland A/S aamma Godthåb Transportservice A/S suleqatigiinnermi maanna peqataalersut.

- Ingerlatanut annertoorujussuarnut atatillugu suliassat kisimiilluta suliarisinnaanissaannut annertuvallaarujussuartut tamatta nassuerutigisariaqarparput. Taamaammat sumiiffimmi suliffeqarfiit sapinngisamik amerlasuut ataatsimoorlutik suliassat assigiinngitsorpassuit suliarinnittussarsiuinerni neqerooruteqarfigissagunikkik isumatusaarnerulluinnarpoq, Jóannes Niclassen, MT Højgaardimi immikkoortortami pisortaq oqarpoq.

Isumaqatigiissutip nutaajusup nassataraa sumiiffimmi suliffeqarfiit arfineq-marluk, nunat tamat akornanni suliffeqarfissuit suliassanik sapinngisaq tamaat amerlasuunik pissarsiffiginiarnissaannut piareermata.

Suleqatigiinnissamik maannamut akuersisimasuni isuma malillugu sumiiffinni suliffeqartut suli amerlanerusut peqataalertariaqarput.

- Suli amerlanerusut peqataarusussasut tamatta neriuutigaarput, uagutsinnulli pingaartuuvoq amerlanerpaat naammassisinnaanissaat qulakkeerniarlugu, Jóannes Niclassen MT Højgaardimeersoq oqarpoq.