Inuussutissarsiornerup siuarsarnissaa pikkorissassutigaat
Nunatsinni Takornariaqarnermi Inuussutissarsiornermilu Siunnersuisoqatigiinniit pikkorissarnermi aaqqissueqataasoq Sara Heilmann oqarpoq, kommunit kommunerujussuanngortiterpata nutaamik eqqarsarnissaq pisariaqalissasoq.
- Piareersarniarlugit sulinissaminnut sakkusaannik massakkut uani sapaatip-akunnerani immersorpavut, Sara Heilmann oqarpoq.
Nangilluni nassuiaavoq Inuussutissarsiornermi siuarsaanermut pilersaarut 2004-mi naalakkersuisut aalajangersimasaat 2005-miit ingerlanneqarluni aallartissimasoq.
- Siorna nalilersorneqareersorlu erseqqissarneqarpoq kommunit ilaasa Inuussutissarsiornermi siuarsaaneq nukissaqarfigisimanngikkaat. Taamaammat siunnersuutigineqarpoq kommunit kattuussuunnerat iluatsillugu suliassaq taanna iluarsiniarneqassasoq. Taamaammat Inuussutissarsiornermi pisortat katersorpavut sakkussaannillu tuniorarniarlugit, Sara Heilmann oqarpoq.
Taanna aperaarput tassa taava imaannersoq kommunit kattussuuppata allatut periuseqaraluttualernersut.
- Inuutissarsiorneq siuarsarneqassappat kommuneni erseqqinnerusumik suleriaaseqartoqartariaqarpoq. Kommunit ilaanni suliffissaqartitsiniarneq kisimi aallunneqarpoq tassa imaappoq suliffissaaleqisortatik inuussutissarsiuteqartinniarlugit sullissillutik immaqa imatut siunertaqavinngitsumik. Uagulli pikkorissarnermi uani pingaartipparput siuarsaaneq tassa suliffissaqartinniaannarnagit kisiannili anguniagaqartillugit, Inuussutissarsiornermut siunnersorti Sara Heilmann taama oqarpoq.
Inuussutissarsiornermi pisortat pikkorissartinneqarnerat tallimanngorpat naggataassaaq, pisortat iliuuseqarnermut pilersaarusiatik nassarlugit kommuneminnut angerlassapput.
