Inuussutissarsiornerup innarlerneqarnissaa aarleqqutigaat

Nunatsinni sulisoqarnermut sunniuteqarluartut pingasut ullumi tupaallatsitsillutik ataatsimoorlutik Kyotomi isumaqatigiissutip nutarterneqarnissaa, aappaagu Københavnimi pisussaq pillugu oqaaseqaateqarput.
decembarip 03-at 2008 16:10

Sulisitsisut Peqatigiiffiat, SIK aamma Nusuka, Naalakkersuisunut ilaasortamut ammasunik allakkaminni allapput, Kyotomi isumaqatigiissut naapertorlugu CO2-mik mingutsitsinerup annikillisarnissaa piviusunngortinniarneqassappat, Kalaallit Nunaanni aatsitassarsiornikkut ineriartorneq unitsinneqassasoq, allallu suliffeqarfiit nukissiornermik pisariaqartitsisut, soorlu aalisarnerup innarlerneqarnissaa oqaatigalugu.

Nunat tamat mingutsitsinnginnissaq anguniarlugu allagaqartut isumaqatigigaluarlugit, Kyotomi isumaqatigiissut naapertorlugu ingerlasoqaleraluarpat annilaanngatigaat suliffissuaqarneq innarlerneqassasoq, aningaasatigullu Kalaallit Nunaata imminut nappassinnaalernissaa artornarnerulersinneqassasoq.

Københavnimi silap pissusaata allanngoriartornera pillugu ataatsimeersuarnissami Kalaallit Nunaata immikkut piumasaqaatigiumaagassaasa tusaaniarneqarluarnissaat Naalakkersuisumut allagaqartut qulakkeerusuppaat. Taamaassappat aatsaat Kyotomi isumaqatigiissummik atsioqataanissarput innersuussutigisinnaavarput, Sulisitsisut Peqatigiiffiannit Henrik Leth, SIK-mit Jess G. Berthelsen Nusukamiillu, Gerth B. Lynge allapput.