Inuussutissarsiorneq siuarsarneqalerpoq
Inuussutissarsiornermut Pisortaqarfiup ullumi saqqummiutissavaa, nunatsinni inuussutissarsiutinik ineriartortitsinermut atukkat pitsaanerulernissaat anguniarlugu siuarsaanerup nutaamik aaqqissuunnera pillugu nalunaarusiaq.
Nalunaarusiami saqqumiunneqarpoq nunatsinni inuussutissarsiornermi siuarsaanissaq ingerlatitseqatigiiffinnik marlunnik pilersitsinikkut aqqutissiuunneqassasoq.
Ingerlatitseqatigiiffiit tassaapput Inuussutissarsiutinik Inerisaavik kiisalu Annaasaqaataasinnaasunik Aningaasaateqarfik. Inuussutissarsiutinik Inerisaavik, Greenland Tourismep Kalaallillu Nunaanni takornariaqarnermik Siunnersuisoqatigiiffiup kattunnerisigut pilersinneqarpoq. Ingerlatseqatigiiffiup suliassaraa inuussutissarsiutinik nutaanik pilersitsiniartunut siunnersuineq. Annaasaqaataasinnaasunik Aningaasaateqarfik, Sulisa A/S-ip allangortiterneratigut pilersinneqarpoq, ingerlatseqatigiiffiullu suliassaraa annaasaqaataasinnaasunik aningaasaliisarnissaq.
Naalakkersuisut inuussutissarsiornikkut aaqqissuussinerat nutaaq atorlugu avammut tuniniarneqarsinnaasunik sammisaqartut amerlanerulernissaat anguniarneqarpoq, kiisalu suliffeqarfinnik aallarniiniartut pitsaanerusumik siunnersorneqartalernissaat.
