Inuussutissarsiorneq ikorfartoqqinniarpaat

Kommuneqarfik Sermersuumi Inuussutissarsiornermut Siunnersuisoqatigiit kommunimi innuttaasut tamaasa inuussutissarsiornermi ineriartortitsinermut peqataatikkusuppai. Taamaattumik siunnersuisoqatigiit inuussutissarsiornermi ineriartortitsinermut aaqqissuussaq "Nukiit - ineriartortitsinermut tunngavissaq" sapaatip akunnerani matumani aaqqissuutissavaat.
Allattoq Elisa Isaksen
januaarip 24-at 2013 04:59

Aaqqissuussineq Nukiit kommunimi illoqarfinni nunaqarfinnilu aqqaneq marluusuni minnerpaamik marloriarluni ingerlanneqassaaq.

- Innuttaasunik isumasioqatigiissitsinerni innuttaasut namminneq angorusutaminnik angusaqarnissaannik ikorfartussavavut. Tamatuma kingorna pikkorissaanernik aaqqissuussissaagut, anguniagaasalu killiffii ataavartumik malinnaaffigissallutigik ikorfartorlugillu. Matumani innuttaasut tamarmik ineriartortitsinermut sunniuteqarlutik suleqataanissaminnut periarfissinneqassallutik, Kommuneqarfik Sermersuumi Inuussutissarsiornermut Siunnersuisoqatigiit siulittaasuat Marie Fleischer oqarpoq.

Taassuma inuussutissarsiornermut ineriartortitsinermi isumasioqatigiinnissat isumalluarfigai, tassami siunnersuisoqatigiit kommunimi innuttaasut pimoorussinerat piumassuseqarnerallu malugisarmassuk.

Aaqqissuussineq Nukiit siullermik Qeqertarsuatsiaani januaarip 26-anni 27-annilu ingerlanneqassaaq tamatumalu kingorna Tasiilami, Illoqqortoormiuni, Paamiuni Nuummilu nunaqarfittaanilu aaqqissuunneqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq