Inuussutissanik nioqqutissiorfiit nakkutigineqarnerat nunatsinnut

Inuussutissanik nioqqutissiorfiit nakkutigineqarnerat Namminersornerullutik Oqartussat akisussaaffigilissaneraat nalilersorneqartussanngorpoq.

- Apeqqut soqutiginartittupilussuuara, taamaattumik misissuiviginiarpara Namminersornerullutik Oqartussat suliaq qanoq ilillugu akisussaaffigilersinnaaneraa, Suliffissuaqarnermut Sulisoqarnermullu Naalakkersuisoq Siverth K. Heilmann oqarpoq.

- Soqutiginninninnut ilaatigut pissutaavoq misilittagaqarfigigatsigu aalisakkanik tunisassiorfiit tunisassiorsinnaanermut akuerititsiniaanermi ilaatigut sivisuumik utaqqisoqartarnera taanna aamma nammineq misilittagarfigalugu oqaatigaara.

Naalagaaffiup Inussutissalerinermik Nakkutilliisuini Ålborgimi pisortat ilaata Mogens Clausenip arfininngormat radioaviisimut oqarnera soqutiginnilersitsivoq, taanna oqarpoq akisussaaffik Namminersornerullutik Oqartussaniissanersoq imaluunniit Danmarkimiiginnassanersoq politikkikkut aalajangernissaa apeqqutaasoq.

Siverth K. Heilmannip ullaap tungaa tamanna pillugu atorfilittani oqaloqatigipallassimavai.

Aatsaaginnaq atorfilittannik oqaloqateqapallakkama, Fødevaredirektoratimik suleqateqarneq qanoq innersoq paasiniaatigalugu, aammalu Namminersornerullutik Oqartussat tigusissagaluarpata qanoq akeqarsinnaanersoq, qanoq kinguneqarsinnaanersoq allanillu, oqaatigiinnarsinnaavara piumasaqarama pitsaasunik ajoqutaasinnaasunillu uannut allakkiortoqartariaqartoq.

- Massakkut paasigallakkakka malillugit koruunit 15-it 20 millionillu akornanni akeqassaaq.

Pineqartoq siunniunneqassappat Inatsisartuni aatsaat nalilersorneqarluni oqaluuserineqaqqaarluni aalajangiisoqarsinnaasoq, Siverth K. Heilmann erseqqissaavoq.