Inuussutissanik Nakkutilliisoqarfik nunatsinnut nuunniarniarneqarpoq
Naalagaaffiup Inuussutissanik Nakkutilliisoqarfia nunatsinnut nuunneqarpat sunik iluaqutissiisinnaanersoq iluaqutissiissannginnersorluunniit Namminersornerullutik Oqartussani atorfillit misissuitinneqalerput. Akisussaaffik tigussagutsigu, inatsisinik atuutilersunik inatsisilerituut ingerlaavartumik malinnaasussat atorfinitsinneqartariaqartut, Inuussutissarsiornermi Pisortaqarfimmi uumasut nakorsaat, Inuussutissalerinermi Atuisunillu sullissinermilu pisortaq,
Lasse Holm oqarpoq.
Ullutsinni Danmarkimi Inuussutissaqarnemut aqutsisoqarfik inatsisiliortuusoq Lasse Holm oqarpoq namminnerlu inatsisilerituunik atorfinitsitsissagunik, taakkua EU –mi inatsisinik atuutilersunik malinnaatinneqassasut.
- Aamma taakkua ingerlaavartumik Inatsisartunut Naalakkersuisunullu EU –mi inatsaalersut nunatsinni aamma atuuttussat pillugit ilisimatitsisartussaapput, taamalilluta malittarisassat maleqqissaarniassagatsigit. Suliat tamakku taama ulluni makkunani atukkatsinni akeqanngitsumik Danmarkimit pisakkavut, akisussaaffik tigusissagutsigu nammineq akilertalertussaavagut, Lasse Holm nassuiaavoq.
Inatsisilerituunik atorfinitsitsinerup saniatigut Namminesornerullutik Oqartussani immikkoortortaqarfik nutaaq pilersinneqassaaq, tassanilu atorfeqartussat suliffeqarfinnik EU –mut aalisakkanik tunisassiortartunik nakkutilliillutik angalasasssapput aammalu aalisariutit EU –p malittarisassaannik eqqortumik malitaqarnersut nakkutigissavaat.
Akisussaaffimmik tigusinissaq ajornartoqanngilaq, taamaaliortoqarsinnaalluartoq, Lasse Holmip erseqqissarpaa. Danmarkip Kalaallillu Nunaata akornanni isumaqatigiinniartoqassaaq. Kisianni Lasse Holmip oqaatigiuminaannerarpaa Inuussutissalerinermut Danmarkimi aqutsisoqarfiup nukiit qanoq atsigisut isumaqatigiinniarnermut atorumanerai. Tamatumunnga pissutaanerarpaa inatsisiliornermi inuppassuit sulisinneqartariaqartarmata.
- Kisianni tigusinissaq ajornartoqanngilaq. Politikkikkut angorusutaq angujumagaanni aammalu aningaasanik illuartitserusukkanni anguneqarsinnaasoq, Inuussutissarsiornermi Suliffissuaqarnermilu Naalakkersuisoq, Siverth K. Heilmann, naapertorlugu, Inuussutissanik Nakkutilliisoqarfik nunatta akisussaaffigilissappagu, 15- 20 millioni koruuninik tamanna naleqassaaq.
