Inuussutissanik eqqusseqqusiunnaarneq Polar Seafoodimut ilungersunartoq
- Eqqorneqarnissarput ernummatigaarput, eqqorneqassaguttami ajornartorsiungaatsiassagatta, Polar Seafoodip siulersuisuini siulittaasoq, Henrik Leth, Radioaviisimut oqarpoq.
- Qanoq kinguneqarsinnaanera misissuleruttorparput. Nunarpummi EUmut ilaasortaanngikkaluartoq Danmarkimut atanerput pillugu eqqugaasinnaagatta, Henrik Leth oqarpoq.
Milliardip sisamararterutaata nalinganut ajutooratarsinnaavoq
Polar Seafoodip Ruslandimuinnaq ukiumut 300 millionit koruunit nalinganut nioqquteqartarpoq, Henrik Lethilu naapertorlugu nioqquteqaqqusiunnaarnerup Royal Greenland Iceberg Seafoodilu aamma sakkortuumik eqqorsinnaavai.
Polar Seafood Ruslandimi tunisassiorfeqarpoq poortuivittalimmik, Ruslandimullu nioqquteqarunnaassagunik tamakku eqqorneqartussaapput.
AAMMA ATUARUK Polar Seafood naatsorsuutimigut angusarissaartoq
- Inissisimaffipput naalliunnarpoq, iliuuseqarsinnanngilagummi, neriuinnarpugut Nunatta EUmut ilaasortaannginnera isiginiarneqassasoq, Henrik Leth Moskvamit nalunaarutip kingunerisinnaasaanik misissuileruttortoq oqarpoq.
Ukrainemi pisut pisuupput
Premierministerip Dmitrij Medvedevip TV-kkut oqalugiarnermini oqaatigaa, inuussutissat neqit, aalisakkat, immuit naatitallu Europami nunanit, USA-mit, Australiamit, Canadamit Norgemillu Ruslandimut tunisassiarineqartartut, maannakkorpiaq eqquteqqusaajunnaassasut. Nutaarsiassaqartitsivik Reutes taama allappoq.
Ukrainep ilaata russinit tiguagaanerata kinguneranik, nunat killiit russinut ataasiakkaanut taamatullu Ruslandimut aningaasatigut mattussinerisa kingunerinik,taama aalajangiineq pissuteqarpoq.
