Inuussutissalerinermik Nakkutilliineq kalaallit tigulissuk

Naalagaaffiup inuussutissalerinermik Nakkutilliisoqarfiani, avammut tuniniaanermi immikkoortoqarfiup pisortaata Mogens Clausen-ip, sapaatip akunnerani kingullermi kujataani suliffeqarfiit misissuiffigeqqammerpai.

Suliffeqarfiit aalisakkanik nunanut allanut nioqqutissiorsinnaatitaasut tamarmik, maleruaqqusat sakkortuut maleqqissaarlugit ingerlapput, kisianni nakkutilliineq Namminersornerullutik Oqartussanit ingerlanneqarluarsinnaagaluartoq, Mogens Clausen oqarpoq.

Akisussaaffik Namminersornerullutik Oqartussanniissanersoq imaluunniit Danmarkimiit ingerlanneqassanersoq politikkikkut aalajangiinnagassaasoq, suli Danmarkimiit ullumikkumut ingerlanneqartoq, siornatigut oqaluuserineqartarsimagaluarpoq.

Apeqqutigaarput nunanut EU-mi ilaasortaasunut nioqqutissiussagaanni, malittarisaassat taama sakkortutigisut suut atuutsinneqarnersut aammalu sooq taama piumasaqaatit taama sakkortutiginersut.

Mogens Clausen nassuiaalluni oqarpoq, nioqqutissiorsinnaanermut akuersissummik piniarneq ajornanngitsuusoq, malittarisassat ukiut siuliinili atuuttut suli atuummata. Kisianni ileqqoreqqusat nutaat, EU-mi atorneqartut asseqqissaavi, Kalaallit Nunaannut aamma atuuttussanngorsimasut atortussanngortitaasimapput, taakkulu malillugit nioqqutissiorsinnaanermut akuersissutit suliarineqartalersimallutik.

Allaassutaa tassaasimavoq, nunanut allanut nioqqutissiortalerumallutik akuersissutit Danmarkimiit tunniunneqarpata ingerlaannaq aallartissinnaannginnerat, tamanna aatsaat EU-mi allattorsimaffinniileraanni pisinnaalertalersimammat .

Nunatsinni aalisakkanik nioqqutissiorfiit, Naalagaaffiup Inussutissalerinermik Nakkutilliisoqarfianit, avammut nioqqitissiornissaminnut akuerineqareeraluarsimasut, taamaalillutik qaammatit marluk missanni aatsaat utaqqeqqaartariaqartalersimasut, Mogens Clausen nassuiaavoq.