Inuussutissalerinermi uumasut nakorsaqarnermilu suliassat tiguneqarnissaat mianersoqqussutigineqartoq
Naalakkersuisut Inatsisartuni politikerit inuussutissaqarnermut uumasut nakorsaqarnermullu susassaqarfiup tiguneqarnissaannut siunnersuummik akuersinissaannik mianersoqquaat.
- Inatsisartut suliassaqarfiup tamakkiisumik tiguneqarnissaa pillugu siunnersuutaasoq akuerissagaluarpassuk ilisimasaqassusermik tunngaveqarnavianngilaq, Kalaallit Nunaatalu inuussutissanik aalisakkanillu avammut niuerutigisartagaanut sakkortoorujussuarmik kingunerluutaasinnaasuuvoq, tamannalu nunatta aningaasaqarneranut aamma sakkortoorujussuarmik kalluaassalluni, aalisarnermut, piniarnermut nunalerinermullu naalakkersuisoq Jens Immanuelsen Inatsisartunut akissuteqaammi allappoq.
Aalisarnermut, piniarnermut nunalerinermullu ataatsimiititaliap Naalakkersuisut inuussutissalerinermut uumasut nakorsaqarnermullu susassaqarfiup aappaagu ukiukkut ataatsimiittoqarnerani tigunissaannik isumaqatigiiffiusumik siunnersuuteqarfigalugit peqqussuteqarfigai.
AAMMA ATUARUK Suliassaqarfimmik nuussinissap kinguartinnissaa ataatsimiititaliamit kissaatigineqartoq
Susassaqarfiup tamakkiisumik tigunissaanut aalajangernissamut ilisimasat ataatsimoortumik naammattut ataatsimiititaliaq isumaqarpoq. Ataatsimiititaliamilu ilaasortat siunnersuummut atsioqataasut qiviaraanni Inatsisartuni tapersersorneqarluarpoq.
Ataatsimiititaliap siunnersuutaa Siumumit, Inuit Ataqatigiinnit, Atassummit, Demokraatinit Partii Naleqqamiillu sinniisunit atsioqatigiissutigineqarnikuuvoq.
Sulisitsisut isornartorsiuingaatsiartut
Ataatsimiititalialli siunnersuutaa Naalakkersuisut paasiuminaatsillugulu ernumanartoqartingaatsiarpaat.
Susassaqarfimmi piginnaasat nunatsinni piffissami matumani piginngisagut pisariaqartinneqartut Naalakkersuisut siullertut uparuarpaat, pingaarnerpaatullu tamakkiisumik tigusineq nunatta EU-mut niueqatigiinneranut aarlerinartorsiortitsisinnaavoq.
- Inuussutissalerinermi uumasunullu nakorsaqarfiup akisussaaffigineqarnera tamakkiisoq nunatsinnut nuunneqassaluarpat, nunarput avammut niuertutut nunat pingajuattut inissisimaffeqalissaaq, EU-muinnaanngitsoq nunarsuulli sinneranut tamanut, soorlu assersuutigalugu USA, Rusland aamma Japan, Jens Immanuelsen allappoq.
AAMMA ATUARUK Arbejdsgruppe skal vurdere patienthjem
Ataatsimiititaliap siunnersuutaa Sulisitsisunit aamma isornartorsiorneqangaatsiarpoq:
- Sulisitsisut aalassassimaarutigaat Ataatsimiitsitaliap taama inuussutissalerinermik suliamik tigusiniarnermi unammilligassat annertuut anneruniutigimmagit. Ilaatigut aningaasaqarnikkut allaffissornikkut pineqartut, uanilu ataasinnguamilluunniit nalilersorneqaratik, Sulisitsisuni pisortaq, Brian Buus Pedersen allappoq.
Nunarput immikkut inissisimasoq
Aalisakkanik EU-mut nioqquteqartarneranut atatillugu nunarput immikkut ittumik inissisimasoq
Ataatsimiititaliap isumaliutissiissutaani allassimavoq. Tamassalu tunngavigalugu nunatsinnit aalisakkat EU-mut killeqanngitsumik tunineqarsinnaallutik.
Nunatta susassaqarfik tamakkiisumik tigussagaluaruniuk nunatsinni nakkutilliinermik EU-mi ataatsimiititaliamit akuerineqarsinnaasumik peqalernissaata tungaanut tamanna annaassavaai,
Taamaattoqaraluartorli susassaqarfiup tigunissaanut nalunaajaanerit allat utaqqineqassanngitsut ataatsimiititaliap aalajangersimavaa.
Naalakkersuisup akissuteqaateqarnermini Inatsisartunut aalajangiiffissatut siunnersuuteqarniarnermut piumasaqaatit naammassineqarsimanngitsut erseqqissaatigaa. Siunnersuutip aappassaaneerneqarnissaannut suli ulluliisoqanngilaq.
