Inuusaq Barbie ullumi 50-iliivoq

Arnaq nunarsuarmi nalunnginneqarluartoq, 15 centimeterit missaannaanik angissusilik ullumikkut nalliuttorsiorpoq. Tassami inuusaq plastikkiusoq, Barbie, Arnat Ulluata aqaguani 50-iliilluni inuuissiorpoq.
Allattoq Lotte Holm
marsip 09-at 2009 07:59

Barbie suli inuusuppaseqaaq, tassami inuuserissunnguulluni qitikitsunnguugami. Taamaattorli inuunermi qiteqqutipajaarnerani ajornartorsiuteqarpoq. Inuusanimmi Barbienik USA-mi nioqquteqarneq 6 procentimik qaammatini kingullerni pingasuni appariarsimavoq, nunarsuup sinnerani 28 procentimik appariarsimalluni.

Inuusaq unammillertaa, Bratz, tunisaavallaarunnaarneranut pissutaanerpaavoq, taanna mutiuneruvoq, erinarsortartunullu tusaamasanut Britney Spearsimut Paris Hiltonimullu eqqaanarnerulluni.

Barbieli inuunermi imaalinerani ajornartorsiuteqaraluarpalluunniit 50-iliinera Los Angelesip qanittuani Malibumi angerlarsimaffiani Dream Housemi naleqanngitsumik nalliussineqassaaq, ilutigalugulu Kinami Shanghai-imi illorsuaq arfinilinnik quleriilik, inuusap Barbie-p katersugaasivissuanik immaqa taaneqarsinnaasoq, ullumikkut aamma ammarneqartussaavoq.