Inuunini naallugu parnaarussaavoq

Allattoq Mads Lynge
novembarip 17-at 2006 10:57

Amerikamiut sakkutuunut eqqartuussivianni sakkutooq Irakimi pinngitsaaliilluni arnerisimanini toqutsisimaninilu pillugit inuunini naallugu parnaarussassanngorlugu eqqartuunneqarpoq.

Sakkutooq unnerluussisunut isumaqatigiissuteqarnermigut toqumut eqqartuussaanngilaq.

Sakkutuup eqqartuunneqartup, James Barkerip, sakkutuut allat pingasut ilagalugit marsimi Irakip kujataani illu iserfigaat.

Sakkutuut niviarsiaraq 14-inik ukiulik pingitsaalillugu arneriffigaat kingornalu toqoriarlugu timaa ikuallappaat. Sakkutuut aamma niviarsiaqqap nukaa angajoqqaavilu toquppaat.

Sakkutooq 23-nik ukiulik, James Barker, unnerluutigineqarnerminut nassuerpoq. Taassuma unnerluussisut neriorsorpai sakkutooqatini allat pingasut, sakkutuut eqqartuussivianni eqqartuunneqarnissaanni ikiuukkumalluni. Taamatut neriorsuinermigut toqumut eqqartuussaanissani pinngitsoortippaa.

Barker inuunini naallugu parnaarussassanngortinneqarpoq, ukiut 20-t qaangiuppata misiligummik anisinneqarsinnaasunngorlugu. Aamma taanna nassuerpoq pinngitsaaliilluni arnerinermut toqutsinernullu akisussaasuulluni aamma oqaatigaa Irakimiut qinngarisarigini.

Eqqartuussineq Amerikamiut sakkutuunut eqqartuussivianni suliassanut arlalissuarnut ilaaginnarpoq, tassa taamaaliornikkut Amerikamiut Irakimi tusaamanerlunneqarnerat minnerulersinniarneqarpoq.

Pisimasup Irakimi politikerit eqqarsalersippai pissusissamisuussannginnersoq, sakkutuut Amerikamiut Irakimi ajortuliaat Irakimi eqqartuussivitsigut suliarineqarpata.