Inuuniarnitsigut eqqungaassaagut

Akit assigiikkunnaarnerisa kingunerisaanik nunaqarfiit illoqarfiillu amerlanersaani imermik atuinerup akia qaffaavigineqassaaq.

Nunaqarfinni imertartarfiit kommuninit ingerlanneqartut, atorneqarnerisa qafaataat ingerlatsisuinit akilerneqassapput.

Akunnaami imermik atuinerup akia 66 procentimik qaffanneqassalluni.

Akunnaarmiut ilaqutariit Lars aamma Rakel Olsen illuminni imermik kuuinnartumik peqarput, taakkua qaffaat 66 procentiusoq koruuninngorlugulu 11,11 koruuniusoq namminneq akilertalissavaat.

Lars Olsen tamatumunnga ernumavoq.

-Maannamut qaammammut 300 koruunit sinnilaarlugit akiliisarsimavugut, ukiullu naanerani 1165 kr-inik atuinermut naleqqussaanermut akiligassamik nassinneqarluta, Lars Olsen oqarpoq.

Taanna imermut kubikmeterisut annertutigisumut 11 koruuni 11 oorinik akiligassamigut qaffaavigineqartunut ilaavoq.

Maani aningaasarsiorfiusinnaasunik periarfissaqarpianngitsumiilluni ernumanarpoq, tassami piniartuinnaalluni sila naalagaangami, nuliaralu ullormut 4 tiimiinnaat sulisarluni, inuuniarnikkut eqqungaassuugut, Lars Olsen oqarpoq.

- Imeq inuuniarnitsinnut pingaaruteqaraluaqisoq, atornera annikilliniarsarissuarput, Lars Olsen oqarpoq