Inuuniarneq akisunerulersoq
Qaammatip naalernerani aningaasat kontunniittuutitit ikinnerusalerpat? Tamanna nunatsinni nioqqutissat kiffartuussinerillu akiinik naatsorsuinermi kingullermi immaqa nassuiaatissarsisinnaavat.
Akit ukiup qaammataani siullerni arfinilinni 1,2 procentinik qaffariaateqarsimapput. Tamannalu ukiuni kingullerni tallimani akitigut qaffariarnerpaaffiuvoq.
Pingaartumik immikkoortoq sunngiffik aamma kulturi qaffariarfiuvoq, qaffariaataasoq 6,7 procentiulluni, immikkoortullu allat appariaateqarfiupput. Taakkunani ilaatigut pineqarput illumi atortorissaarutit 1,9 procentinik appariaateqarfiusut kamippaallu 1,6 procentinik appariaateqarfiusut.
2017-imi ukiup qaammataani siullerni arfinilinni nioqqutissat kiffartuussinerillu akii 1,2 procentinik qaffariaateqarfiupput.
Atuisunut akip naleqqersuutaata ataatsimut naatsorsornerani, nioqqutissat ilaat ilaminnit naatsorsuinermi naleqqersuutaat qaffasinnerusarpoq. Nioqqutissat assigiinngitsut akiisa ineriartornerat, allatut oqaatigalugu soorlu issingigassat aaqqatillu naleqarnerisa pingaassusiat assigiinneq-ajortoq.