Inuunerup isumaa pillugu isumassarsiaq nutaaq

Uumassusillit suulluunniit misissoraanni takuneqarsinnaavoq suut tamarmik uumassusillit pinngoqqaaramilli sananeqaataat aaqqissuulluakkatut, iluserissuullutik inissitsiteqqissaarsimasarput. Suulluunniit avatangiiserigaluarutsigit paatsiveqanngilluinnartoqartarpoq, avatangiisilli sananeqaataasinnaasullu iluarsaanneqartutut pileraangamik, uumassusilik pinngoriartulertarpoq. Sunaluunniillu uumassuseqaleraangami, tulluarsaqqissaakkatut ilusillit aaqqissuulluaqqissaarlugit inissitsitertutut pilersarpoq. Avatangiisillu sananeqaataasa tulluarsarunnaarlutik paatsiveerukkiartuinnarsinnaanerat uumassusillip kigaalakkiartortittarpaa. Naatsumik oqaatigalugu, uumassusillip imaluuniit inuunerup pinngoraangami sunaluunniit tulluarsarlugu aaqqissuunniarsarisarpaa. Taamatut paasinnilluni eqqarsaasersorneq sumulluunniit atorsinnaanngitsutut oqaatigisinnaagaluarlutigu, nunarsuatsinni inuunerup pinngorsimanera nassuiarniassaganni, inuunerullu isumaa nassuiarniarneqartuartillugu, inuunerup aallaavippiaa, avatangiisinullu sunniutaa paasiniaqqaartariaqarparput. Aatsaat tamakkua paasilluareerutsigik qanga inuunerup pinngorsimanera paasinialissallugu soqutiginaateqalissaaq. Sunaluunniimmi uumassusilittut qaqugukkut taaneqarsinnaalernera paaseqqaanngikkutsigu, aamma nunarsuatsinni inuunerup pinngorsimanera piffissalersorsinnaanngilarput, ilisimatooq Minik Rosing oqarpoq.