Inuunertusiartorpugut

Nunatsinni inuit arriitsumik amerliartorusaarput. 2004-mi inunngorsimasut toqusimasunit 400-inik amerlanerusimapput, siornaallu inunngortut toqusunit 430-inik amerlanerusimallutik. Tamannalu nunatsinni nakorsaanerup 2005-imut ukiumoortumik nalunaarutaani atuarneqarsinnaavoq.

Nunatsinni agguaqatigiissillugu inuuneqqortussuserput nunanut avannarlernut allanut naleqqiulluni suli ukiualunnik sivikinnerugaluartoq taamaattoq inuuneqqortusiartorpugut. Nunatsinni nakorsaanerup 2005-imut ukiumoortumik nalunaarutaani oqaatigineqarpoq nunatsinni inuuneqqortussuseq nunanut avannarlernut allanut naleqqiulluni ukiunik quliniit 14-it tikillugit sivikinnerusoq.

Nunatsinni inuuneqqortussutsip arriitsuinnarmik sivitsoriartornera assigiinngitsunik pissuteqartoq oqaatigineqarpoq.

Ajunaarnerit, inuusuttullu akornanni imminornerit suli amerlavallaartut, nappaatillu tobamit peqquteqartut, soorlu puakkut kræfteqalersarnerit uummallunnerillu suli amerlavallaarneri minnerunngitsumillu peqqinnissaqarfimmi sullissinikkut nukissaalatsineq arriitsuinnarmik inuuneqqqortusiartornitsinnut pissutaasut, nalunaarummi oqaatigineqarpoq.

Nunatsinni angutit ukioq 2005-imi agguaqatigiissillugu 64,6-inik ukioqalersarsimapput, arnallu ukioq taanna agguaqatigiissillugu 70,4-nik ukioqalersarsimallutik. Savalimmiormiut uagutsinnit utoqqaanerulersarput, Savalimmiuni angutit ukioq 2004-mi agguaqatigiissillugu 77-inik ukioqalersimasut arnartaat agguaqatigiissillugu 81,3-nik ukioqalersimapput.