Inuunerittap tunissutai
Juulli qalliartuinnarpoq, tunissutissanillu tunioraaneq aallartimisaalereerpoq. Soorlu Peqqissutsimut Avatangiisinullu naalakkersuisoq, Agathe Fontain, siullermeersumik Inuunerittamit tapiissutinik aningaasanik agguaaqqammerpoq – tassaasunik suliniutinut inuunerinnerulernermik kinguneqartussanut tapiissutinik.
Tapiissutit 400.000 koruuniusut suliniutinut peqqinnartunut makkununnga agguaanneqarput:
Ilulissani pujortarunnaarniartunut ilitsersuisunngornianut pikkorissaanermut, Narsami meeqqanut inuusuttunullu peqqinnartunik nerisassiortalerusuttunut, Nuummi, Kapisilinni Qeqertarsuatsiaanilu angajoqqaanngortussanut pikkorissaanermut, Aasianni skateboard-ertarfimmik pilersitsinianut, Qaqortumi sukuutsertarfiup qullilerneqarnissaanut aamma nunatsinni naartusut pualavallaat pinaveersimatinnissaanut aningaasaliissutit.
Aammattaaq Nanortallip atuarfiani imiisivinnik pisinissamut tapiisoqarpoq.
Inuunerittamit tapiissutit siunissami ukiumut marloriarluni agguaanneqartassapput. Tapiiffigineqartassapput suliniutit pinaveersaartitsinermik peqqinnerulernissamillu siunertaqartut, taamalu siunertarineqarluni nunatsinni inuit peqqinnerulernissaat inuunerinnerulernissaallu.
