Inuuneritta pillugu paasisitsiniutit siammarterneqaleruttorput
Naalakkersuisut peqqinnerulernissarput anguniarlugu ukioq 2012-ip tungaanut suliniutaat Inuuneritta pillugu paasisitsiniutit siammarterneqaleruttorput.
Aalanerunissarput naatitanillu nerinerunissarput taavalu imigassamik ikiaroornartumillu hashimik atornerluinerit annikillisinneqarnissaat siunertaralugu akeqanngitsumik katsorsaasarnissat paasisitsiniutini ilaatigut atuarneqarsinnaapput.
Inuunerittami tupatortarneq annertuumik aamma sammineqarpoq. Pujortartartut ukioq 2012-iutinnagu ikilerujussuarsimanissaat anguniarneqarpoq, siornaak 2005-imi innutaasut 64 procentii pujortartartuusimapput, taakkulu 40 procentiinnanngortinneqarnissaat siunniunneqarpoq.
Inuuneritta aqqutigalugu annersaasarnerit kinguaasiutitigut atornerluisarnerit imminortarnerillu aamma ikilisarniarneqassapput, aamma meerartatta utoqqartattalu atugaat pitsanngorsarniarneqarlutik.
Inuuneritta pillugu paasissutissiissutini anguniakkat qanoq ililluni anguneqarnissaat ersarissumik nassuiaatigineqarsimanngilaq, aallaqqaasiutaanili kikkut tamarmik suliniarnermut peqataaqqullugit naalakkersuisut siulittaasuat Hans Enoksen aamma peqqissutsimut naalakkersuisuusimasoq Agathe Fontain kajumissaaruteqarput.
