"Inuuneritta" inatsisartuni saqqummiunneqassaaq
Peqqissutsimut pisortaqarfiup inuiaqatigiit peqqinnerulernissaat anguniarlugu suliniutaa ”Inuuneratta”-mik qulequtalik pillugu nassuiaat peqqissutsimut naalakkersuisumit Asii Chemnitz Narupimit, Inatsisartut ullumi ataatsimiinneranni aamma saqqummiunneqassaaq.
Inuiaqatigiit peqqinnerulernissaannik suliniuteqarnerup aallartereersup ukioq 2012 ilanngullugu ingerlanneqarnissaa pilersaarutaavoq.
Peqqinnerulernissarput anguniarlugu suliniuteqarfissanut assigiinngitsunut sisamanut agguataarneqarsimapput. Imigassamik aanngajaarniutinillu atornerluineq, timip atorneqarnera, annersaasarneq, pujortartarneq kiisalu atoqatigiittarnermut tunngasut suliniuteqarfigineqassallutik.
Peqqinnerulernissarput anguniarlugu maannamut suliutaareersut tassaapput imminornermut akiuiniarneq, kigutiginnerulernissarput, naartusunullu meeqqanullu tunngasut. Taakku suliniarfigineqarnerat suliniutissanut atasumik ingerlaannassaaq.
”Inuuneritta”-mut atatillugu peqqissutsimut pisortaqarfik sineriammi angalaarluni innuttaasunut ataatsimiititsinernik oqallitsitsinernillu siorna ingerlassaqarsimavoq.
Innuttaasut ”Inuunerittamut” peqataanerunissaat isummersueqataanissaallu angalaarnerit aqqutigalugit anguniarneqarsimavoq. Innuttaasuttaaq peqqissutsimut atatillugu sulinerminni misilittakkatik naapertorlugit siunnersuutaat nassuiaatigineqartussamut ilanngutassanngorlugit angalanermi aamma katersorneqarsimapput.
