Inuuneritta inatsisartuni aappassaaneerneqarmat oqallittoqarpianngilaq
Imminortarneq, imigassamik atornerluineq, kinguaassiutitigut atornerluinerit,
tassaapput innuttaasut peqqinnarnerusumik inuunissaannut suliniummi Inuunerittami sammineqartussat pingaarnerpaat ilaat.
Inatsisartut ippassaq ataatsimiimmata Inuuneritta sammineqarpoq, aappassaaneerneqarluni.
Siullermeerneqarmat oqallittoqangaatsiarpoq, ippassarli oqallittoqarpallaanngilaq.
Suliniut naalakkersuisooqatigiinni Siumukkunnit Atassutikkunniillu inatsisartut peqqissutsimut ataatsimiititaliaanni tapersersorneqaraluariarluni inatsisartut ataatsimiinneranni sammineqalermat tunuartertoqalerpoq aningaasaliiffigineqarnissaanut nangaanartoqartinneqarmat.
Aningaasaliiffigineqarnissaa sammineqanngikkaluarluni Inuuneritta ippassaq oqallisigineqarmat, aappagumut aningaasanut inatsisissap sapaatip akunnerata tulliani sammineqalerpat, aningaasalerneqarnissaa oqallisigineqassaaq.
Peqqissutsimut naalakkersuisoq Asii Chemnitz Narup oqarpoq siunnersuummut atatillugu paatsuunganarsinnaasut ersarissarneqarmata.
