Inuunera navianartorsiorunnaarpoq

Niviarsiaqqap Islandimi nakorsarisaa ima oqarpoq:

- Oqaatigisinnaavara niviarsiaqqap inuunera navianartorsiunngimmat. Suliaritinnermi kingorna anersaartuuteqartinneqareerluni ippassaq anersaartuutaa peerneqarpoq. Inuunera ulorianartorsiorunnaaraluarpoq, kisianni suli peruluttut inaanni suli nakkutigaarput, aqagu tungaanut, ullulli ataasiakkaarlugit aalajangiiffigineqartarumaarpoq, Islandimi illoqarfiit pingaarnersaaniit Reykjavikip napparsimavissuani nakorsat qullersaat doktor Møller oqarpoq.

Niviarsiaraq Tasiilamiit sukkanerpaamik arfininngornermi unnukkut Islandimukaanneqarpoq, tikimmallu tuaviortumik naamigut suliarineqarluni. Niviarsiaqqap inuunera ulorianartorsiuissimanersoq nakorsat qullersaata oqaatigerusunngilaa, oqaluttuaraalu niviarsiaraq sapiissimaqisoq.

Politiit oqaluttuarnerat malillugu arfininngormat ullukkut niviarsiaraq ukioqatiminik nukappiaqqanik eqqaminni pinnguaqateqartilluni aallartoorfigineqarpoq.

- Politiit misissuinerisa takutippaat meeqqat qulit inorlugit ukiullit niviarsiaqqap angerlarsimaffiata eqqaani pinnguartillugit aallaasit illup silataaniittut pinnguarnermut ilanngunneqarsimasut, igittoqarmallu niviarsiaraq eqqorneqarsimavoq, Politimesterip tullersortaa Morten Nielsen oqarpoq.

Morten Nielsenip oqaatigaa, maannakkut suli paasineqanngitsoq niviarsiaraq nammineerluni imaluunniit nukappiaqqat ilaat aallaammik igissimanersoq. Ulluni tulliuttuni qanoq pisoqarsimanera politiinit misissorneqarallassaaq, misissuinerlu taanna naammassippat qanoq pisoqaqqinnissaa politiinit aalajangerneqassaaq.

- Periarfissanik assigiinngitsunik takorluuisoqarsinnaavoq. Pinerluttulerinermut inatsimmi allaqqavoq meeqqat aqqaneq marluk inorlugit ukiullit aallaasinik sakkunillu ulorianartunik atueqqusaanngitsut. Inatsit unioqqutinneqarsimanersoq misissussavarput, taamaattoqarsimasinnaanerali ilimaginngilarput. Taamaanngippat politiit maleruaqqusaat malillugu aallaasit immeriikkat najuqarfinniiteeqqusaannginnerannik inatsit unioqqutinneqarsimanersoq misissussavarput, Morten Nielsen oqarpoq.

Aallaasimik piginnittuugaanni annertuumik meeqqanut pisussaaffeqartoq, politiit naalagaata tullersortaata naqissuserusuppaa.

- Sakkortuumik inassutigissavarput aallaasinik saqqumisitsinissaq mianersuunneqarnerussasoq, alianartumik pisoqaqqinnginnissaa anguniarlugu. Aallaasit ulorianaqaat, tamatigullu aallasit qanoq ulorianartigineri meeqqat ilisimaneq ajorpaat, Morten Nielsen oqarpoq.

Politiit erseqqissaatigaat aallaasit imassallu immikkut inissisimatinneqartassasut.