Inuulluarniutit ullumimiit akitsorput
Inatsisartut ullumimiit akitsuutit atuutilersippaat, tassalu sodavandit, sioraasat, immiaaqqat, imigassat tupalu akitsorput.
Cigaritsit 20-t 6 koruuni 80 øremik, sioraasat kiilumut 69 øremik, sodavandit liiterimut 3 koruuni 50 øremik, viinni puiaasaq 9 koruunimik, kiisalu imigassaq kimittooq puiaasaq 53 koruuni 85 øremik akitsorlutik.
– Akitsuuseeqqinnerit akuerisinnaanngilagut. Aasimmiaasiit pissakinnerit eqqugaassapput, taama Nuummi innuttaasut aqqusinermi naapitagut ilaatigut isummersorput.
Pauline:
-Uanga isumaqatiginngitsorujussuuara pissutigalugu ukua perusuttut akilissaqqaarpaat. Ukua ajornartorsioreersut suli aningaasakinnerulissapput. Taamaalilluta Kalaallit Nunaanni ajornartorsiutit aaqqikkiartornavianngilagut.
-Aaqqitassaqarpugut ajornartorsiutinik annertuunik akitsuisaqattaarnikkut inuit qunusaarlugit ”akitsorput pisiarissanngilasi”-kkuusaarluta aaqqinnavianngilagut, allanik eqqarsatariaqarpugut.
- Ajornartorsiutit annerit marluk, tassalu imertarnermut inuillu oorikilliortut akitsuinikkut aaqqinnavianngilagut. Allatut aaqqittariaqarpagut. Aammalu meeqqat taakkua annertuumik eqqorneqarnerusussat.
Naasunnguaq:
- Isumaqataanngingajappunga. Ingasangajappoq, imaanngilaq suna tamarmi akitsorneqapiluussasoq.
Jane:
- Ataasinngorpamiit akitsussappata isumaqarpunga siusippallaartoq, isumasiueqqaarnani aalajangiineq tulluarsorinnginnakku.
Gerda:
- Isumaqarpunga eqqortariaqanngikkaluaraatigut uagut inuinnaasugut. Akuerisinnaanngilara taannartaa. Akissaqanngilagut taamatut akitsoqqinniarpatigit. Ajorpoq. Akuerisinnaanngilara.
- Innuttaasut eqqunngikkaluarlugit arlaatigut iliuuseqartariaqarsimagaluartut.
Pisiniarfiit nioqqutissat niuertarfimmiittuutigeriikkatik akitsoqqusaanngilaat, aatsaalli nioqqutissat nutaat takkuppata akitsuutilersueqqusaapput.