Inuulluaqqusiniat decembarip aallaqqaataani Vejlemiittariaqassapput

Danmarkimi kalaallit peqatigiiffiisa kattuffiat INUIT Vejlimi ukiumoortumik juullerpalaartumik naapeqatigiissitsisarnerat ukiormanna 32-ssaannik ingerlanneqalerpoq.

Vejlimi Idrættens Husimi ukiumoortumik kalaallit Danmarkimiittut nunatsinni ilaquttaminnut ikinngutiminnullu juullimi pilluaqqusisarnerat pisarnertut aallakaatitassiarineqassaaq, arfininngornermilu decembarip aallaqqaataani pissalluni.

Timersortarfik ullaap tungaani nalunaaqutaq qulinut ammassaaq, ullup-qeqqanullu Sct. Nikolaj Kirkemi kalaallisut naalagiaqatigiinneqassalluni.

Kattuffiup INUIT, peqatigiiffiit assigiinngitsut, ilinniartut, efterskolertut, napparsimasut, parnaarussivimmiitut, politikerillu inuulluaqqusinerat, erinarsoqatigiinnernik atuffassinernillu akunnilertarlugit, ualikkut ingerlanneqassapput.

Juullimi pilluaqqusineq KNR-TV-mit immiunneqassaaq juulleriartorneranilu aallakaatinneqassalluni.

Katerisimaarnissamik aaqqissueqataasoq, Rimdahl Høegh, katerisimaarnissamut pilerisaarutigalugu aamma oqarpoq, katerisimaarnerup ingerlanerani, Nunatsinnut uterlugulu billitsi Air Greenlandimeersoq; eqqorneqarsinnaajumaartoq.