Inuttuumasoq inuunermi sinnerani parnaarussaassaaq

Inuttuumasumik taaneqartalersimasoq, Armin Meiwes, inuunermi sinnera parnaarussaasussanngorlugu Tysklandimi ullumi eqqartuunneqarpoq. Ingeniøri toqoriarlugu timaata ilaa Armin Meiwesip nerisimammaguli ”inuttuumasumik” taaneqartalerpoq. Ingeniøri taanna Meiwesip internetsikkut chaterluni attaveqarfigisalersimavaa.

Armin Meiwesip sakkukinnerusumik pillagaanissaa illersuisuisa Frankfurtimi eqqartuussivimmut uteriisissutigigaluarpaat, ”toqutsinissamik innimiiffigitissimasutut” taasaq tunuliaqutaralugu parnaarussaaqqugaluarlugu. Armin Meiwesimi oqartuaannarpoq, ingeniørip toqorusulluni kissaataa maliinnarsimagini.

Tamanna illoqarfimmi Kasselimi eqqartuussivimmit malinneqamisaaraluarpoq, tassanimi aalajangerneqaraluarpoq, inuarsimanini pissutigalugu ukiut arfineq-pingasut affarlu Meiwes parnaarussaassasoq. Frankfurtimili eqqartuussivik sukannernerusumik aalajangerpoq, Armin Meiwes inuunermi sinnera parnaarussaasussanngortillugu.

Unnerluussisut ilaata tunngavilersuutigaa, toqutsineq kinguaassiuutitigut atoqateqarusunnermut tunngassuteqarmat – toqutsinerlu isiginnaarummut Meiwesip immiussimammagu - sakkortunerusumik pillaatisisariaqartoq.

Eqqartuussinerup inernerata illersuisunit ingerlateqqitassanngortinneqarnissaa ilimagineqarpoq, pisimasorlu amiilaarnartoq taanna Tysklandimiinnaanngitsoq, aammali nunarsuup sinnerani, kingumut malinnaavigeqqinneqaqqissagunarluni.