Inuttut pisinnaatitaaffinnut tunngatillugu naliliiffigineqarnini Danmarkip pitsaanerulersikkaa
Danmark inuttut pisinnaatitaaffinnut tunngatillugu Naalagaaffiit Peqatigiinnit 2011-mi naliliiffigineqarpoq. Danmarkimi inuttut pisinnaatitaaffinnut tunngatillugu pitsanngorsaatissatut nunanit allanit kaammattuutigineqartut taamani katillugit 133-iullutik.
Danmark arlalissuarnik uparuarneqarpoq
Danskit tungaannit aallaqqaammut immikkoortut 84-it akuerineqarput 49-llu akuerineqaratik, nalunaarusiaagallartumili nutaami immikkoortut allat 20-t akuerineqarput allallu qulingiluat isumaliutigineqartussanngorlutik. Kaammattuutigineqartut 16-iinnaat itigartinneqarput. Suliniutissanilli nutaanik pilersaartoqanngilaq - Danmarkimmi suliniutit aallartisarneqareersut innersuussutigai.
Kaammattuutigineqartut ilarpassui Nunatsinni pissutsinut tunngasuupput. Naalagaaffeqatigiimmi nunatsinni angerlarsimaffimmi nakuusertarnerup akiorniarneqarnissaanut pisussaaffilersimapput, aammattaaq meeqqat akilersittartutut kinguaassiuutitigut atugaasarnerisa aammalu tunineqartarnerisa akiorneqarnissaat pillugit isumaqatigiissutit Nunatsinnut Savalimmiunullu atuutilersinneqarsinnaanerat misissorneqaleruttorpoq.
Kaammattuutigineqartut maanna akuerineqartut ilagaat inuit ikinnerussuteqartut nunallu inuii immikkoortitaaqqunagit illersorneqarnerunissaannik Sydkoreamit kaammattuutigineqartoq. Aammattaaq amerikamiut kilitsissiaqarfiata CIA-p tigusanik nunatta silaannaatigut assarsuisarsimasinnaaneranik misissuisoqarnissaanik Schweitzimit kaammattuutigineqartoq akuerineqarpoq. Tamannalu DIIS-ip 2012-mi nalunaarusiorneratigut pisimasoq oqaatigineqarpoq.
Nunat Naalagaaffiit Peqatigiinnut ilaasortaasut tamaasa inuttut pisinnaatitaaffinnut tunngatillugu ukiut sisamakkuutaarlugit naliliiffigineqartarput. Danmarkilu Universal Periodic Reviewimik taaneqartumik naliliiffigineqarnerisa siullersaraat. Naliliineq tulleq 2016-imi pisussaavoq. Tamannalu sioqqullugu tamanut ammasumik tusarniaanerit arlallit pisussaapput, Danmarkimi inuttut pisinnaatitaaffinnut tunngatillugu sutigut kinguleruttoqarsimaneranik innuttaasut isumasiorneqassallutik.
