Inuttut pisinnaatitaaffiit pillugit Institutti kalaallit Danmarkimiittut atugaannik misissuivoq

Kalaallit Danmarkimiittut 3000-it immersugassaannik nassinneqarsimapput, Instituttillu neriuutigaa taakkunannga 1000-it immersugassanik utertitsiumaartut.

- Danmarkimi innuttaasut Kalaallit Nunaanneersut kommunimut, isumaginnittoqarfimmut, peqqinnissaqarfimmut, atuarfimmu, nalinginnaasumillu Danmarkimiinnerminni sunik misigisaqartarpat? Ikiorsiissutinik allatuulli pissarsisinnaappat, imaluunniit aporfeqartarpat, tamannalu nunamit allaminngaanneernerat pissuteqartarpa. Tamakkuupput misissorniakkagut, Inuttut pisinnaatitaaffiit pillugit Instituttip assigiissitsinissaq pillugu immikkoortortami pisortaq Susanne Nour Magnusson nassuiaavoq.

Kalaallit Danmarkimiittut Instituttimit siullerpaamik misissuiffigineqarput.

- Kalaallit Danmarkimi ikinnerussuteqartut ilagaat immaqa malugineqarpallaarneq-ajorput, aammalu immikkuullarissumik inissisimallutik danskitut innuttaassuseqartuugamik. Taamaammat tamatuma immikkut misissuiffigineqarnissaa nuannaarutigaara.

Inuttut pisinnaatitaaffiit pillugit Instituttip misissuineq sioqqullugu Danmarkimi sullissiveqarfiit kalaallinik sullitaqartut attavigisimavai, ilaanniillu tikkuarneqartoq tassaavoq kalaallinik immikkoortitsinermik assigiinngitsunik ajornartorsiuteqartoq.

- Kalaallilli toqqaannartumik aperalugit annerusumik misissuisoqarsimanngilaq, tamannalu piffissanngorsaarput. Aamma misissuinerup inerneri saqqummiunnissaat qilanaarisupilussuuarput, Susanne Nour Magnusson oqarpoq.

Misissuineq pingasunik immikkoortoqassaaq, Kalaallit Danmarkimi inatsisitigut isumannaatsuunerannik misissueqqissaarineq, immersugassat atorlugit misissuineq aammalu sammisat tallimat aallaavigalugit kalaallinik Danmarkimiittunik apersuinerit. Misissuineq tamarmi aappaagu maajimi juunimiluunniit naammassineqassangatinneqarpoq.