Inuttut piginnaanngorsarfik Narsami ammarneqarpoq

Inuttut piginnaanerit qaffassarnissaannik Narsami atuartitsivik, Multicenter, ukiuni pingasuni ingerlaqqittussanngorpoq.

Centeri, pisortatigoortumik tallimanngormat atoqqaarfissiorneqartoq, pingasunik immikkoortoqarpoq, tassaallutik Højskole, inuttut ajornartorsiortunik siunnersuisarfik taavalu imigassamik ajornartorsiutilinnut katsorsaavik.

-Højskole eqqarsaatigalugu ilinniagaqalernissamut atorfimmulluunniit ingerlariaqqinnissamut atorluarneqarsinnaavoq, taama oqarpoq Multicenterip pisortaa, Sten Egede Hegelund.

Paasinarpoq takusinnaavarput inunnik aalajangersimasunik taamatut ingerlariaqqinnissamut sammititaqarnissaq pisariaqartinneqartoq aammalu kommunimi sullissinermi, ilaatigut takuneqarsinnaanngoreerpoq. Soorlu inunnik ikiuinermi saaffiginnittartut, socialip suleriaasianik paasinninnerulersimapput.

Tamassumunnga pissutaavoq inunnik ikiuinermi inatsisit taakkununnga sukumiisumik nassuaatigineqarnikuugamik. Tassa imaappoq, pikkorissatinneqartut inunnik ikiuinermi inatsisitigut qanoq periarfissaqartitaanerlutik paasisinnaanngoramikku.

Modul II tassa massakkut pilersaarusiorlugu aallartipparput, apeqqutaavoq modul I –tut sivisutigisariaqarnersoq imaluunniit imarisai modul I-minngaanniit sakkortunerussanersut, modul I-mit siunertaqarnerulluni, immaqa ilinniakkamik aallartitsinissamut piareersimanerulernissaat anguniarlugu sammisitat aalajangersimanerulluinnartut ingerlannissat takorloorneqarpoq. Taannalu upernaap ingerlanerani pilersaarusiorlugu ingerlannissaa takorloorneqarpoq.

Taama oqarpoq Sten Egede Hegelund, Narsami Multicenterip pisortaa.

Centerip ukiuni pingasuni misiligutaasumik ingerlanissaanut Narsap Kommunia Namminersornerullutillu Oqartussat aveqatigiillutik aningaasalersuissapput.