Inuttut ammarnissaq pikkorissaasup pingaarnerpaasoraa
Paamiuni aappariit kisimiittullu 15-it pikkorissarnertik ataasinngormat aallartippaat, sapaatip-akunnerini pingasuni pikkorissassallutik. Pikkorissaasoq Najâraq Røddik oqarpoq, kamaqarneq qaangerlugu inuttut ingerlariaqqinniaraanni ammarnissaq pingaarnerpaasoq.
- Peroriartornitsinni suut-uku mattussimagigut? Nanisinnaanngisagut ukiuni arlalinni kamannguussimasut, taakku avammut saqqummiunnaveersaartuakkat kannggusigutut inissisimaffiusimasut, Najâraq Røddik oqarpoq.
Sapaatip-akunnerini pingasuni sammisassat ima agguataarpaat:
Siullianni: Imminut qiviarneq. Inersimasutut inuuninni sumiippunga? Peroriartornermi atukkat, killissat allallu.
Aappaanni: Pikkorissaqataasut tamarmik qitornaqarmata perorsaanissamut nukissaqalernissamut sakkussanik imminut qiviartillugit tunioraaneq.
Pingajuanni: Angajoqqaatut inuttullu piffissamut aggersumut pilersaarusiorneq. Qanoq alloriarniarpunga. Nukissat suut pigilerpakka? Qanoq pitsaanerusumik ingerlariaqqissinnaavunga?
- Inuit ataasiakkaarlutik ilinniakkat tungaatigut, suliffeqarnerup tungaatigut allatigullu inuunermi alloriaataasinnaasunik ujartuissapput, Najâraq Røddik oqarpoq.
Pikkorissartut sakkussanik tunineqarput, siunissamili nammineq inuunertik qanoq ingerlatissanerlugu aalajangissavaat.
- Imaanngilaq sapaatip-akunneri pingasut qaangiuppata suna tamaat saperunnaarsimassagaat. Aatsaat suliassaq pimoorullugu aallartissavaat, erseqqissaavoq.
Pikkorissaasoq isumaqarpoq ukiup ataatsip ingerlanerani pikkorissartut imminnut nassaariortussasut.
- Massakkut sakkussat assigiinngitsut tunniussuunneqarput.
Najâraq Røddik arfinilissaa ilaqutariinnik pikkorissaasoq oqarpoq, pikkorissartittakkami ajornartorsiutaat assigiinngitsorujussuusartut. Atugarliortuinnaanngillat, ilaat atugarissaartuusarput ulluinnarni angajoqqaatut ingerlariaqqinnissamut sakkussaaleqisut. Tamarmilli suliniummi Paamiut Asasarami tikilluaqqusaasut oqaatigaa.
Namminersornerullutik Oqartussat Ilaqutariinnut pikkorissaanermut ukiumut aningaasaliissutaat ukiuni kingullerni amerliartorput. Pikkorissartitsinissanut illoqarfiit arfinillit 2007-imi 600.000 koruuninik tunineqarput, siornalu illoqarfiit aqqanillit 1,2 millioni koruuninik tunineqarlutik.
