Inuttat pingasut tigummigallarneqaraluartut iperagaapput
- Upernarsarsinnaavarput tigummigallakkat pingasut iperagaammata, tigummigallarnissaannut tunngavissaarukkatta, Politiit pisortaat Morten Nielsen oqarpoq. Suliarli pillugu annerusumik Morten Nielsen oqaaseqarusunngilaq kiisalu ikiaroornartumik pasilliinermik suliaq ingerlanneqarnersoq pillugu ilumoorneraajumanani.
Politiit angallataata pujortuleeraq 36 fodsinik angissuseqartoq Nanortalimmiit ingiaqatigalugu arfininngornermi aggustip 22,-anni Nuummukaappaat. Politiit kiisalu ikiaroornartumik ujaasinermi qimmit atorneqartartut marluk pujortuleeraq Nanortalimmiinnerani misissuiffigeqqaaraluarpaat, tamatumalu kingorna inuttat pingasut tigummigallagassanngortinneqaraluartut, Nanortalimmiut arlallit radioaviisimut oqaluttuarput.
Tusarfiit allat tigummigallagaasunik ilisimannittut radioaviisimut oqarput, pujortuleeqqami ikiaroornartumik nassaartoqanngitsoq, tamatumalu kingunerisaanik inuttat pingasut iperagaasut. Politiit suliamut tunngatillugu suli misissuinersut Politiit pisortaat Morten Nielsen oqaaseqarumanngilaq.
