Inuttaqanngitsumik timmisartornermi malittarisassat nutaat Nunatsinni atuutilersinniarneqartut
Inuttaqanngitsumik timmisartornermi malittarisassat nutaat Danmarkimi septembarip aallaqqaataaniit atuutilerput.
- Malittarisassat Kalaallit Nunaanni atuuttut Danmarkimi atuukkunnaarput, Danmarkimi nutaanik malittarisassaqalermat. Taakkualu Nunatsinnut aamma atuutilersinniarlugit suliaq Naalakkersuisunut Inatsisartunullu saqqummiunniarparput.
Ineqarnermut attaveqaqatigiinnermullu immikkoortortami pisortaq Olafur P. Nielsen taama oqarpoq.
Danmarkimi inuit namminneq inuttaqanngitsunik timmisartorniarunik ingerlatsisinnaanermut allagartaqaqqaartariaqarlutillu sillimmaseeqqaartariaqarput.
- Inuimmi sulerinertik ilisimalluarpassuk, akuerisaanngitsumillu timmisartuararnatik, tamanna toqqissisimanarnerussammat, Olafur P. Nielsen oqarpoq.
Danmarkimi malittarisassat Nunatsinni aappaagu atuutilersinnissaat naalakkersuisup naatsorsuutigaa.
