Inuttaq ipilluni ajunaartoq
Islandimi sineriammik nakkutilliisut ikioqqusissummik ippassaq unnukkut nalunaarfigineqarput. Kilisaat 13-inik inuttaqartoq Tunumi umiarsuaatilinnit East-Greenland Codfish A/S-imit pigineqarpoq
- Ammassanniartillutik angut katataavoq. Ilaasa pinasuarlutik annanniummik pujortulimmik miloriussiffigipallappaat, katataasulli tigunngitsoorpaa, kisianni tassa imaani sumiinneranik nalunaarinnippoq, umiarsuaatillit pisortaat Einar Hallsson Atuagagdliutinut oqaluttuarpoq.
Inuttaasut ilaat, angut 30-nik ukiulik Tasiilameersoq imaanut tingilluni ikinngutini tiguaa umiarsuarmullu qaqillugu.
Umiarsuaq alapernaarsuut timmisartorlu qulimiguulik ajutoorfiup eqqannguani sungiusartut ikiortiserineqarput, erngerlutillu ornigullutik. Kisianni silap ajornera peqqutaalluni timmisartumi qulimiguulimmi inuttat ilaat umiarsuarmut ikitinneqarsinnaasimanngilaq.
Timmisartoq qulimiguulik alla nakorsamik ilaasulik Reykjavikimit aallartinneqarpoq. Tassannga nakorsaq allallu marluk wiremik pituutserlugit umiarsuarmut ikitinneqarput. Kisianni uummarsaanerigaluaq iluatsinngitsoq Einar Hallsson Atuagagdliutinut oqaluttuarpoq.
Kilisaat Heguvikimut Reykjanesip eqqaaniittumut ataasinngornermi ullaassakkut nalunaaqutaq sisamanngortoq tulappoq. Tassani inuttat tarnip nakorsaanit oqaloqatigineqarnissamik neqeroorfigineqarput.
Søfartsstyrelsenimi paasiniaasartut pisumik paasiniaallutik maanna Islandiliarput.