Inussuup "Kalaaleqat" taperserpaa
Namminiilivinnissamut suleqatigiiffiup Inussuup peqatigiiffik ”Kalaaleqat” tapersersorniarlugu suleqataaffiginialerpaa.
- Isumaqaratta Kalaaleqammi toqqarneqarsinnaasut inuit inuiaallu kalaallit akornanni maligassiuilluartut pikkunartunillu angusaqarsimasut taava isumaqarpugut inuit taakku immikkut malunnartinneqartariaqartut, Mininnguaq Kleist oqarpoq.
Taanna isumaqarpoq tamanna inuiaqatigiinnut meeqqanut inuusuttunullu maligassiuinikkut iluaqutaalluarsinnaasoq.
Mininnguaq Kleist aperaarput Kalaaleqammut toqqarneqartussaq qanoq angusaqarsimassanersoq.
- Kalaaleqammut aaqqissuussisussat tamanna aalajangissavaat. Kisianni uanga nammineq assersuuteqassaguma soorlu pikkunartumik angusaqartut ilaatigut soorlu Mount Everest-imut qaqisimasut, qimussersimasut Uno Fleischerikkut assigisaallu toqqassagaluarpakka, Mininnguaq Kleist assersuusiorpoq.
Taannali erseqqissaavoq tamanna ”Kalaaleqat”-mi ilaasortat tamanna aalajangigassarigaat.
Peqatigiiffik ”Kalaaleqat” 2006-imi decembarip 16-iani pilersinneqarpoq. Naatsorsuutigineqarporlu inuk ”Kalaaleqat”-mut siullertut toqqarneqartussaq juunip 21-iani inuiattut ullorsiornitsinni pissasoq.
