Namminiilivinnissamut suleqatigiiffik Inussuk Tunngaviusumik Niuernermik Ilinniartitaanerup, TNI-p, oqallisigineqarneranut akuliuppoq, Nunaqavissullu Suliffiutillit Kattuffiata, NuSuKa-p siunnersuutaa tapersersorlugu.
TNI-mi ilinniarnernikkut, assersuutigalugu pisiniarfimmiunngortoqarsinnaallunilu nakorsap allattaatut ilinniartoqarsinnaavoq, ukiunilu sisamani tallimaniluunniit ilinniartoqartarluni.
Inussuup NuSuKa-llu tamanna sivisuallaarsoraat, TNI-llu sivikillisarneqarnissaa siunnersuutigalugu.
TNI aqqutigalugu ukiuni marlunni pingasuniluunniit ilinniartoqartarnissaa siunnersuutaavoq.
- Ukiuni marlunni pingasuniluunniit ilinniagassaq ilinniarneqarsinnaappat nunatsinnut piukkunnarnerujussuuvoq tulluarnerullunilu, Inussuk allappoq.
Nunatsinni pissutsit aallaavigalugit naleqqussaasoqarnissaa Inussuup pingaartuunerarpaa.
Suliffeqarfiit suleqatigiinnerisigut oqinnerusumik sukkanerusumillu ilinniartitsisinnaaneq anguneqarsinnaassasorineqarpoq.