Inussuk Ilulissat pilersinneqarpoq

Nunatta namminersulernissaanik naalagaaffinngornissaaanillu suliniaqatigiiffiup Inuussuup immikkoortortaqarfia siulleq sisamanngormat Ilulissani aallartinneqarpoq.

Immikkoortortaqarfik atserneqarpoq, Inussuk Ilulissat, suliniaqatigiiffik Inussuk tusagassiuutinut taama nalunaarpoq.

Suliniaqatigiiffiup Inussuup Nunarput tamakkerlugu sapinngisamik amerlanerpaanik immikkoortortaqarfeqalernissani suliniutiginiarpaa, immikkoortortaqarfillu tulliuttoq Sisimiuni apriilip aallaqqaataata missaani aallartinniarneqarpoq.

- Ullut namminersulernissamik utaqqiinnarunnaarfiit nallerpavut timitalersuinissarpullu tullinnguuppoq, suliniaqatigiiffik Inussuk, tusagassiuutinut allagaqarluni ilaatigut taama allappoq, Namminersorneq pillugu Isumalioqatigiissitap isumaliutissiissummik atsiugaqarnissaa suliniaqatigiiffiup utaqqiniarnagu allappoq, namminersulernissap taasissutigineqarnissaata tungaanut inuiaat Kalaallit paasisitsiniaaffigineqarnissaat pingaaruteqarnerarlugulu peqataaffiginiarpaat.