Inuppassuit qimagussorneqarput

USA-p avannamut kangisinnerusortaani qarsutsinersuaqarmat inuit ikinnerpaamik 16-t ajunaarput, qarsutsinerillu ima annertutigaat inuit 150.000-nit ikinnerunngitsut annanniarlutik angerlarsimaffimminniit qimaasariaqarsimallutik. Ullut arlerlugit kuisiinnavilluni siallerujussuarnerata kingunerisaanik kuuppassuit sinerminnik qarsutsilerput, pissutsillu ullumikkut suli ajornerulernissaat oqartussaasut ernummatigaat.

Qarsutsinernit ajornerpaamik eqqugaapput nunap immikoortui Pennsylavania, New York, New Jersey aamma Maryland, tamaani illorsuarpassuit immap ataaniilereersimapput aqquserngillu aseruatiterlutik.

Saputit allallu ajutoornaveersaarnermut atortuusinnaasut atasinnaajunnaartut oqartussaasut illoqarfiit ilaanni malugigamikkik inuit 200.000-nit ikinnerunngitsut qimagussornissaat naalakkiutigisariaqarsimavaat.

New Jersey-mi atsissumiittumi illoqarfimmi Trentonimi, kuussuup Delaware-p eqqaaniittumi innuttaasorpassuit angerlarsimaffimminnit aamma qimagussoqquneqarsimapput.

Tamaani politikerit nuimasut ilaat, Brian Hughes, oqarpoq, 1955-imili taamarsuaq qarsutsisoqarmalli kingumut aatsaat taama annertutigisumik qarsutsisoqaqqittoq, navianartorsioqalutillu erseqqissaavoq.

Innuttaasut imermik suli annertunerusumik takunissartik naatsorsuutigisinnaavaat.

– Ajornerpaaq suli takkutinngilaq, Pennsylvaniami guvernøri, Ed Rendell, TV-qarfimmut Fox-imut ullaaq-manna oqarpoq.