Inuppassuit Gazamiit qimarrapput

Gazami pissutsit Naalagaaffiit Peqatigiit isumannaallisaaniaqatigiivisa ullumi katersuukkunik oqallisigissavaat. Nunaminertaq Gaza israelimiunit tiguagaaqqavoq, palæstinamiullu sakkutuui tamaanngaanniit killeqarfik qulaallugu Israelip tungaanut qaartartumeerisaqattaarput.
januaarip 24-at 2008 06:55

Tamaani pissutsit najummassimaarnarnerat pissutigalugu inuppassuit Gazamiit nalunaaquttap akunnerini 24-ni kingullerni qimarrapput.

Killeqarfiup matoqqasup qarmarsua ippassaq qaartartumeeriffigineqarluni ikinnerpaamik 15-inik putuneqarmat palæstinamiut ikinnerpaamik 350.000-it nunaminertap Gazap killeqarfia qaangerlugu Egyptenimi Sinai-ip inoqajuitsortaanut ingerlaartut Naalagaaffiit Peqatigiit nalunaarutigaat.

Palæstinamiunilli tusarfiit oqarput qimarrarttut amerlanerusut, oqarlutik inuit millionit affaat missaanniittut killeqarfik qaangersimagaat.

Palæstinamiut 1,5 millionit missaanniittut nunaminertami Gazami nalinginnaasumik najugaqartarput.

Palæstinamiut killeqarfiup qarmaata putuisigoorlutik Egyptinimi illoqarfimmut al-Arishimut nioqqutissanik iluatsillugu pisiniartarput. Illoqarfik taanna killeqarfimmiit 50 kilometerit missaannik ungasissuseqarpoq, Gazamilu amigaatigineqartut, soorlu nerisassat, ikummatissat allallu ippassaq tunisaalluaqaat.

Killeqarfiup palæstinamiut sakkutuuinut sorsukkumatuunut ammaannalernera Israelimit assut ernumanartoqartinneqarpoq, palæstinamiummi sakkunik nunaminertamut Gazamut maanna eqqussuisinnaanngormata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq