Inuppassuarnut tusarnaartitsivoq

KNR TV-kkut arfininngormat isiginnaartut takusimassajunnarsivaat DGI, tassa danskit eqaarsaartartuisa nuna tamakkerlugu takutitsinersuanni, 35.000-nit peqataaffigineqartumi, TV-kkut aallakaatitami naggataasigut Rasmus Lyberth-ip erinarsornera. Taassumalu misigisimasani ima oqaluttuarai:

- Erinarsukkama erinniortua qangarsuarli suleqatigisarakku, taassuma aperisimavaanga taalliaa erinniaalu erinarsorusunnginneriga, taannalu akuerisimavara. Misigisaq nuanneqaaq, tassami inuppassuupput tusarnaartigisakka. Aamma aallaqqaammut soorunami pissanganaqqaarpoq, sekundilli marluk ingerlanerinnaani ingerlaannaq sungiuppara. Aamma inuppassuit isigiitigalugit erinarsorluni nuanneqaaq.

Rasmus Lyberth Danmarkimi Odensimut nooqqammerpoq, nuunninilu ima oqaluttuaraa:

- Naluneqanngilaq utoqqakassanngoriartulersunga, 55-inimmi ukioqalissaanga. Erinaq taannaajuarneq ajorpoq, taamaammat erinalussitinnanga suleqatigisartakkakka Danmarkimiittut qanillillugit misilikkusuppara. Aamma nuliara suliffittaarsimavoq ernerpullu aamma maani atualissalluni. Aamma Kalaallit Nunaat qimaanavianngilaq, piumalleruttami uteqqissaagut.

Rasmus Lyberth-ip qanittukkut nuuteeraq saqqummersitaa, inuppassuarnit nuannarineqarpoq.

- Assorujussuaq tupinnaannartumik qisuariarfigineqarpoq, ataasialinngilangami nuusiortarninni, kisianni aatsaavissuaq inuit toqqaannaavissumik uannut saaffiginnittarput, nuuteeraliannik nuannarinnillutik, ilaat aamma qujaniartarput, Rasmus Lyberth naggasiivoq.