Inupiluaqqat pineqaatissinneqartut
Unnerluussisussaatitaasup saqqummiussai naapertorlugit angutit inuusuttut pingasut 30-riarlutik inatsisinik unioqqutsisisimasutut unnerluutigineqarput, taakkunannga pinerluutigineqartut amerlanerpaartaat tillinniarnernut attuumassuteqarlutik.
Taamaasilluni Sisimiuni tillinniarnerit ikileriarnissaat illoqarfimmi politiit isumalluarfigisinnaalerpaat.
Unnerluussummi saqqummiunneqartut tamakkerlugit nukappissanit nassuerutigineqarput. Aamma eqqartuussinermut atatillugu nassuiaanerminni oqaatigaat susassaaleqigamik taamatut pinerlunniartarsimallutik.
Taamaalluni pineqaatissiissut ima isikkoqarpoq:
17-inik ukiulik Pinerluttunik Isumaginnittoqarfimmit ukiuni marlunni nakkutigineqartussanngorlugu eqqartuunneqarpoq.
19-inik ukiulik, siornatigut tillinniartarsimasutut politiinit ilisimaneqartoq, sakkortunermik pineqaatissinneqarpoq, tassa qaammatini aqqanilinni pinerluuteqarsimasunut Inissiisarfimmiittussanngorlugu eqqartuunneqarami.
20-nik ukiulik, aamma siornatigut tillinniartarsimasutut politiinit ilisimaneqartoq, qaammatini marlunni Pinerluuteqarsimasunut Inissiisarfimmiittussanngorlugu eqqartuunneqarpoq.
Nukappissat aamma aningaasanik katillugit 116.400 koruuninik akiliisussanngortitaapput.
