Inunnut ataasiakkaanut tungasunik misissuisoqassanngilaq

Ammeriviup pisortaata Michael Nielsenip illuliortitsisimaneranut tunngasut pillugit Ammerivimmik piginnittut Namminersornerullutik Oqartussat misissuinianngitsut Naalakkersuisut Siulittaasuat Hans Enoksen oqarpoq.

Ammeriviup misissuffigeqqissaarneqarnissaa naalakkersuisut aalajangeraat, Piniarnermut Aalisarnermullu Naalakkersuisoq Finn Karlsen Inatsisartut ippassaq ataatsimiinneranni oqarpoq.

Great Greenlandip pisortaata Michael Nielsenip naalakkersuisoqarfik avaqqullugu suliarinnittussarsiuussisarnermut inatsit malinnagu illuliortitsisimaneranik paasisaqarsimaneq misisisueqqissaarnissamut tunngaviusut Aalisarnermut Naalakkersuisoq oqarpoq, Great Greenlandillu pisortaata Michael Nielsenip misissuinerup ingerlanerani sulifimminit suliunnaarallarnissaa Naalakkersuisuni aalajangiusimagitsik ippassaq oqaatigaa.

Great Greenlandimi inunnut ataatsiakkaanut tunngatillugu misissuisoqarnissaanik Naalakkersuisut aalajangigaqarnikuunngitsut, Naalakkersuisut Siulittaasuat Hans Enoksen oqarpoq. Ammeriviup aningaasaqarneranut atatillugu, tassa Ammeriviup pisortanit tapiiffigineqarani ingerlasinnaaneranut atatillugu misissuisitsinissaq maanna piareersarneqartoq, Great Greenlandimi inunnut ataasiakkaanut tunngassuteqanngilluinnartoq attuumassuteqaranilu Hans Enoksen erseqqissaateqarpoq.