Inunnik ujaasinerit marluk aallarteruttorput

Nutarterneqarpoq sisamanngorneq nal. 15:20: Ujarneqartut marluk suli maqaasineqarput. Uummannami politiit ujaasineq ullumikkut unitsikkallarpaat, aqaguli tallimanngornermi ullaakkut ujaasileqqissallutik.

Pavia Gotfredsen aamma suli maqaasineqarpoq. Issittumi Sakkutooqarfiup umiarsuaa qulimiguullillu 60-inik ukiulimmik angummik ujaaseqataasut, politiit ilisimatitsipput.

60-inik ukiulik Pavia Gotfredsen Narsamiit marlunngormat aallartoq kingornalu takuneqaqqissimanngitsoq politiit ujaaraat.  Politiit issittumilu sakkutooqarfik qulimiguulimmik umiatsianillu ullumikkut ujaasisut, Politiini pigaartut qullersaata Lina Davidsenip oqaatigaa.

- Takunnittoqarsimappat uagutsinnut attaveqartoqarnissaa kaammattuutigaarput, Lina Davidsenip oqaatigaa.

Uummannami politiit aamma ujaasipput. Matumani ujaarineqartoq tassaavoq angut 26-nik ukiulik Niaqornaneersoq, taanna ataasinngormat ullaakkut qassuseriartorluni allaramili takuneqaqqissimanngilaq.

Ujaasineq ilaqutaasut pingasunngornermi unnukkut nalunaaruteqarnerani aallartinneqartoq, Qaasuitsumi Politiit paasissutissiipput.

Umiatsiaaqqat qulimiguullillu atorlugit ujaasisoqarpoq, taakkuli saniatigut politiit qatserisartunit namminerlu kajumissutsiminnik ujaasisunit inuusuttumik aalisartumik ujaasinerminni ikiorneqarput.

- Pigisanik umiatsiaaraaneersinnaasunik nassaartoqarpoq, politikommissær, Palu Petersen oqarpoq.

Angutip ujaarineqartup umiatsiaaraq Askeladdenimik meqqilik, 16 fodsiusoq, motorilu Marinamik meqqilik, 55 hiistiusoq atorlugu aallarpoq. Umiatsiaaraq silataatigut qaqortuuvoq iluatungaalu sungaartoq aappaluaartuuvoq.

Aaqqiineq: Politiit ilisimatitsinerat naapertorlugu Narsami ujaarineqartoq 39-nik ukioqartoq siusinnerusukkut allakkaluarparput. Tamannali eqqortuunngilaq. Pavia Gotfredsen 60-inik ukioqarpoq.