Inunnik isumaginnittut marlukkaarlutik sulisalernissaat siunniunneqarpoq

Nuup Kommuneani isumaginninnermi siunnersortit affai sinnerlugit amigaatigineqarnerat ajornartorsiortoqarneralu nassuerutigalugu, Nuup Kommunea immikkut ittumik iliuuseqarnialerpoq. Siunnersortit allaffimmiullu marlukkuutaarlutik suleqatigiittalernissaat anguniarneqalerpoq, siunnersortit allaffissornerup tungaatigut oqilisaanneqarniassammata.

- Allaffimmiut isumaginninnermut siunnersortitut sulinavianngillat, kisianni ikioqatigiillutik sulisinnaapput. Allaffissornertaa allaffimmiup suliarisinnaavaa, siunnersortillu isumaginninnermut tunngasut suliarisinnaallugit. Nuup Kommuneani kommunaldirektør Kim Hvistendahl nassuiaavoq.

Kim Hvistendahl isumaqarpoq, marlukkuutaarluni sulisoqartalerpat suliassat ullumikkornit naleqqiullugu sukkanerusumik pitsaanerusumillu naammassineqartalissasut.

Isumaginninnermut siunnersortitut kommunemi sulilerlaaq qaammammut 15.000 koruunit sinnerlugit aningaasarsiaqartarpoq, aningaasarsiallu sulisussaaleqinermut peqqutaaqataammata kommune Namminersornerullutik Oqartussanut saaffiginnissuteqassamaarpoq, misissueqqusillutik.

- Inuiaqatigiinni piumasaqaatit eqqarsaatigalugit isumaginninnermut siunnersortit aningaasarsiaat appasippallaarput. Kim Hvistendahl naliliivoq.

Nuup Kommuneata borgmesteria Agnethe Davidsen ippassaq oqarpoq, isumaginninnermi siunnersortissaaleqinerujussuaq qaangerniarlugu ilaatigut allaffimmiunik qaammatini pingasuni pikkorissartitsinikkut oqilisaassiniartoqarsinnaasoq.

- Allaffimmiut suleqataasussat ilinniarteqqissinnaanissaat misissussavarput, sulisut amerlanerusut pigilerniassagatsigik. Kim Hvistendahl erseqqissaavoq.

Isumaginninnermi siunnersortit ulapipilunnertik pillugu tallimanngormat ima nassuiaateqarput:

- Soorlu arlaatigut “qamitsiniaaginnaavittaqattaarluta” sulivugut. Nuup Kommuneani isumaginnittoqarfimmi immikkoortortami ingerlatsisoq Karen D. Jensen taama oqarpoq.

Pissutsilli taamaannerat tupaallaatigisimanagu kommunaldirektøri erseqqissaavoq.

- Isumaginnittoqarfimmi suliassat amerlanerulersimapput, sulisullu suliassaqarnerulersimallutik. Taamaattumik pingaaruteqarpoq, sulisugut oqarfigissallugit, pingaartinneqarmata inuiaqatigiinnilu pingaarutilerujussuarmik suliaqarmata. Inuunermut tunngasunik suliaqarput, taamaattumik tapersersorneqarnissaat pisariaqarpoq. Kim Hvistendahl oqarpoq.

Isumaginninnermi siunnersortit suliaasa ilaat ataatsimiititalianut aalajangiiffigisassanngortinneqartarput, siunnersortit ilaasa uggorerisaannik. Suliat taamaalillutik piaartumik naammassinissaraluat pinngitsoortittarlugu. Taamaattumik suleriaatsit nalilersorneqaqqissasut Nuup Kommuneanni kommunaldirektør Kim Hvistendahl erseqqissaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat