Inunnguaq Agathelu coronamut ersiuteqarlutik napparsimmavimmit misissorneqarumanngitsut
Toqqusaarlunneq, kissarneqarneq mamassusersiutaarunnerluni. Tassa coronavirusimik tunillanneqarsimasut ersiutaanni naliginnaanerpaanut ilaasut. Nakorsaanerullu ersiuteqartut misissorteqqullugit angerlarsimaannaqqullugit kaammattortuarpai.
Inunnguaq Korneliussen Upernavimmeersup napparsimalerami coronamut ersiuteqarami misissortikkumalluni napparsimmavimmut saaffiginnippoq. Napparsimavilli ima akissuteqarpoq:
- Maani coronartoqanngimmat Upernavimmi misissortissinnaanngilagut. Allamiillu tikeqqamminnginnatta, Inunnguaq Korneliussen oqarpoq.
AAMMA ATUARUK Upernavimmi killilersuutit arlallit atuuttut
Upernavimmi coronavirusimik tunillanneqarsimasut 81-it ippassaq paasineqarput, sapaatit akunnerata naanerani nunatsinni coronavirusimik toqquteqartoq siulleq aamma Upernavimmiuuvoq. "Illoqarfimmi tuniluuttoqartorujussuusoq" Nunatsinni nakorsaaneqarfiup paasissutissiissutigaa.
Inunnugaq Korneliussen coronavirusimut misissortikkumalluni saaffiginnimmat Upernavimmi nappaammik tunillatsissimasoqanngilaq. Nunatsinni coronavirusimik tunillatsittoqarsimasoq paasineqarmalli nappaammik ersiuteqartut misissorneqartarneri ileqqunngornikuuvoq.
Inunnguaq Korneliussen napparsimmavimmut misissortikkumalluni saaffiginnikkaluarluni itigartunut ilaavoq.
Upernavimmiulli ilaasa misissortikkumallutik arlaleriarlutik saaffiginneqqaarlutik tunngavilersuilluaqqaarlutilli misissortissimallutik oqaluttuaraat.
Aggeqqoriarlugu misissortissinnaannginneraraat
Agathe Knudsen Inunnguaq Korneliussenip itigartinneqarneranut assingusumik misigisaqarpoq. Taanna sapaatip akunnera nualloreerluni coronamullu ersiuteqarami napparsimmavimmut misissortikkumalluni saaffiginnippoq.
Taanna napparsimmavimmut aqaguani ammukaannaqqullugu oqarfigineqarpoq. Aqaguanili allatorluinnaq paasitinneqarpoq.
- Misissortikkiartuleruma sukkut iseriartussanerlunga paaserusullugu ullaap tungaani qujanartumik sianeqqaarama. Oqarfigiteriasaarpunga piffissamik inniminneeqqaassasunga ajornartileriataarlugulu misissortinnissara.
- Tunngavilersorpaat aamma Upernavimmi coronaqartoqanngitsoq inuillu nuallummata misissortinnanga angerlarsimaannassasunga, Agathe Knudsen oqarpoq.
AAMMA ATUARUK Tunillanneqarsimasutut paasineqartuni 104-ni 81-it Upernavimmiittut: Illoqarfimmi tassani tuniluuttoqartorujussuusoq
Upernavimmili sapaatip akunnerata siuliani coronavirusimik tunillanneqarsimasunik siumuisoqarpoq. Taamaammat piffissamik inniminneeqqaanngikkaluarluni misissortikkiartortoqarsinnaanngorlugu oqartussat periarfissiipput.
Agathe Knudsenilu qaammatit marluk utaqqereerluni kiisami misissortippoq.
Tanna Inunnguaq Korneliussenilu sapaatit akunnerata siuliani misissortinnerminnit tunillatsissimanatik paasivaat. Allalli coronaviruseqarlutik saaffiginnissimagaluartut itigartitaasimanissaat ernummatigaat.
Aatsaat taama pisoqanngitsoq
Upernavimmi coronavirusimik tunillanneqarsimasoq siulleq aasaq siumorneqarpoq. Taamani tunillatsittoqarsimanera suli paasineqanngitsoq innuttaasut assingusumik aqqusaagarput.
Tassalu "coronartoqanngimmat misissortinnissaq pisariaqanngilaq".
Qaqugu misissortissavit?
Misissortissaatit:
- Nunanit allanit Kalaallit Nunaannut tikereernerpit kingorna ullut tallimassaanni. Tamakkiisumik akiuussuserneqarsimagaanni tamanna atuutinngilaq. Tikinnermi misissortinneq pillugu annertunerusumik paasissutissat uani atuakkit.
- COVID-19-imik ersiuteqarputit. Ersiutit pillugit annertunerusumik paasissutissat uani atuakkit.
- COVID-19-imik tunillatsissimasumik qanimut attaveqarsimavutit kingullermik, taava misissortissaatit. Qanimut attaveqarsimaneq pillugu annertunerusumik paasissutissat uani atuakkit.
Najoqqutaq: www.corona.nun.gl
Tasiusarmiu Ane-Katrine Nielsen tunillanneqarsimasunut ilaavoq. Taanna ulluni 14-ini ersiuteqarnermini napparsimmavimmut arlaleriarluni misissortikkumalluni saaffiginnittaraluarpoq.
- Kisianni oqarfigineqartarpunga "coronartoqanngilaq, ersiuteqannginnavit misissortittariaqanngilatit". Aali oqaluttuarigaluarlugit ersiutikka tamaasa. Nipaallisaatit imerlu innersuuttarpaat, pamolitortassuungasooq akunnerit sisamakkaarlugit.
- Upernavimmi coronartoqartoq paasigatsigu Tasiusami misissuisoqarnialermat takkuppunga. Ullut marluk utaqqereerlunga paasivara coronamik tunillatsissimallunga, Ane-Katrine Nielsen oqarpoq.
AAMMA ATUARUK Upernavimmi angut coronaqarluni toqusoq
Avannaani nunap immikkoortuani nakorsaaneq Peter Vedsted KNR-imit apersorumagaluarparput, taannali sammisaq pillugu apersorneqarumanngilaq.
Peqqissutsimut aqutsisoqarfimmut saaffiginneqqulluta innersuuppaatigut. Taakkuli piffissarititap iluani akinissartik angumerinngilaat.
