Inummik sapiitsumik akissarsisitsineq

Aappassaa aatsaat pissaaq, ualimullu nalunaaqutaq sisamanut ingerlanneqassalluni.

Nunatsinni sulisitsisut peqatigiiffiat, Grønlands Arbejdsgiverforening, akissarsititsissaaq qallunaatut taallugu ”Nosser-prisen”, tassagooq inummik sapiitsumik akissarsitsineq.

Allannikkut, oqalunnikkut, iliuuseqarnikkut imaluunniit politikkikkut aaqqissugaanermut unammillersimanikkut/isornartorsiusimanikkut, inuiaqatigiinnilu oqalllinnermi sunniuteqarsimasutut – inuttut atukkami kingunerisinnaasai eqqarsaatiginngikkaluarlugit – akissarsitinneqartussaq akissarsisinneqassaaq.

Akissarsititsineq siullermik 1997-mi pivoq, sanasoq Poul Havemann taamanikkut akissarsitinneqarluni, nammineq akilerlugu illuliorsinnaanissamut ilungersorsimanerminut.

Nunatsinni Sulisitsisut Peqatigiiffianit oqaatigineqarpoq, ukiormanna akissarsitinneqartussaq arnaasoq, inuiaqatigiinni pissutsinut isornartorsiuisarnerminik allattarnermigut akissarsitinneqarluni.

Akissarsititsineq ataqqinninnermik isigineqaatitut isigineqartarpoq, tamatuma saniatigut 10.000 koruuninik aningaasartaqarluni.