Inulerisut Aps politiinut tunniunneqarput
Nuup kommuneata suliffissaqartitsiniarnermut atatillugu sullissiviata ”Sullissivik Nuuk”-p suliffeqarfimmik namminersortumik Inulerisut Aps-imik kiffartuussinissamik isumaqatigiissuteqarsimanini ippassaq ingerlaannartumik atorunnaarsippaa. Atorunnaarsitsineq, suliffeqarfiup Ramsdal A/S Sullissivik Nuummit attartugaalluni pikkorissartitsisimaneranik 35.000 koruuninik naleqartumik tunngaveqarpoq, suliarlu politiinut maanna tunniunneqarpoq. Inulerisut Aps-imik suleqateqarnermik ingerlaannartumik unitsitsineq Nuup kommuneani aningaasaqarnermut pisortap Morten Kahlkep ima nassuiarpaa:
- Sullissivik Nuup aningaasaqarnera misissoratsigu paasivarput sulianut arlaqartunut atatillugu Inulersisut aps-ip tungaanit tatiginaginanngitsuliortoqarsimasoq. Tamannalu tunngavigalugu Inulerisut Aps-imik suleqateqarnerput ingerlaannartumik ippassaq atorunnaarsipparput. Morten Kahlke oqarpoq.
Sullissivik Nuup avataaniit attartorlugu siunnersuisarnermut atatillugu suleqatigaa Inulerisut aps Ramsdal A/S-imit pigineqartoq, tassani Jens Lyberth pisortaasoq, Sullissivik Nuummi siunnersortitut ippassaq tikillugu aamma suleqatigineqarpoq.
Morten Kahlke oqarpoq Danmarkimi ukiup matuma ingerlanerani pikkorissartitsisimanermut Ramsdal A/S-imut aaqqissuutsinneqartumut atatillugu aningaasartuutaasimasunik ilisimatinneqarsimanatik.
- Paasineqarpoq Danmarkimi ilinniaqqittarnermut atatillugu aningaasaliisarfimmut aningaasanik qinnuteqartoqarsimasoq pikkorissartitsinermut atugassanik, pikkorissartitsisoqarsinanngilarli, tamannalu inatsisinik unioqqutitsisimanertut uagut nalilerparput, politiinullumi ippassaq tunniunneqarpoq, Morten Kahlke erseqqissaaavoq.
Morten Kahlke erseqqissaavoq pikkorissarneq kommunemi sulisut ilaannit peqataaffigineqartussat naatsorsuussaasimasoq 35.000-inillu naleqartoq kommunemit iniminnigaasimanngitsoq kommunemilu sulisunit peqataaffigineqarsimanani.
Jens Lyberth Inulerisut Aps-ip pisortaa Sullissivik Nuummilu siunnerssortitut inissisimasimasoq oqarpoq pisuutitassarsiornermi nammineq pilliutigineqarsimalluni.
- Qaammatini arlalinni kommunep sulisitaanik misisuisoqarami, taakkulu kukkunersiuisut pillutik pillutik regninngimik nassaarsimasut apeqqusertariaqarsorilluinnakkaminnik, taannalu akiligassaq Ramsdal A/S-ip Sullissiviullu Nuup akornanni suliaasimasunut attuumassuteqarpoq, Inulerisunullu attuumassuteqanngilluinnarluni.
Jens Lyberth erseqqissaavoq pisumut atatillugu pisut tamarmik kommunemit ilisimaneqartut.
- Qangalili naluneqanngillat. Kommune aqutsisuutitaqarpoq kommunaldirektøri Kim Hvistendahl aningaasaqarnermut pisortaq Morten Kahlke allallu marluk aqutsisuutitaapput malinnaajuaannarkikuullutillu, taamaattumik taakkua soorluuna assatik errortorniarsarigaat, tassa akisussaaffitsik puigorsimanngikkunikku qimarratiginiarsarisutut ippaat. Jens Lyberth oqarpoq.
Oqarportaaq pissutsit ingerlasut nalunngereernikuugaat immikkuualuttortai oqaluuserineqartarsimammata, Danmarkimullu pikkorissariartortitsinissaq aqutsisunit kiisalu tassani Styregruppimik taaneqartumi ilisimaneqarluni tusaatissatut tiguneqarnikuusoq.
Jens Lyberth akisussaasuunnginnerarpoq:
- Uanga naatsorsuuserisuunngilanga aamma Ramsdal Inulerisunik piginneqataammat Ramsdalikkut sullissivimmik suleqateqaleraangata avataaneeqqissaartarpunga aamma uani taamaaliorsimavunga.
Jens Lyberthep aamma oqaatigaa pikkorissartitsinissaq pineqartoq Sullissivik Nuummit inniminnigaasimasoq.
Ramsdal A/S-ip inatsisilerituui suliamik aamma misissuisinneqalereerput kommunemullu kingusinnerpaamik aqagu akissuteqaqqusisumut akissuteqartoqassasoq Jens Lyberth oqarpoq.
