Inuktitut oqaatsit pisortatigoortumik oqaasinngortinniarneqarput
Siunnersuutit marlussuit maanna misissorneqarput. Siulleq tassaavoq siunnersuut annertungaatsiartoq, taanna taaguuteqarpoq ”bill seven”. Siunnersuummi tassani qulakkeerniarneqarpoq, inuktitut oqaatsit pisortatigoortumik oqaasinngussasut, allagartani, pisortaqarfiit pappialaataanni, ussassaarutini - minnerunngitsumillu atuarfinni 12.klasse tikillugu ilinniartitsissutini atugaanissaat.
Ataatsimititaliamut oqalugiartunut ilaavoq ilinniarnertuunngorniaq, Solomonie Ryan – arnallu inuusutup taassuma oqariartuutaa ersarippoq:
- Inuktitut oqaatsit puiortalernikuuvakka. Atuarfimmi atorneq ajoratsigik pigiinnarnissaat ajornakusoorpoq, Solomonie Ryan ilaatigut oqarpoq.
Inatsimmut siunnersuut akuerineqassappat Inuktitut aamma Inuinnaqtun oqaatsit atorlugit klassini tamani kingusinnerpaamik ukioq 2019 tikitsinnagu ilinniartitsisoqartalissaaq. Politikerilli inuit neriuutigaat inatsit sukkanerusumik piviusunngorsinnaassasoq –ataasiakkaallu kissaatigaat inatsit sukaterneqassaasoq, atuarfimmi atuartitseriaasissatut siunnersuutip ukiut tallimat ingerlaneranni eqqunneqarsinnaanissaa neriuutigineqarluni, ukiut qulit qaangiuppata pinnani.