Nunavummi inuktitut oqaatsit attaveqaqatigiinnermi pingaarnertut atorneqartariaqarput. Taamaalilluni Nunavummi innuttaasut inuiattut kinaassutsiminnik kinaassuseqalernissaat anguneqarniassammat. Soorluttaaq kalaallit oqaasii Kalaallit Nunaanni aamma taamaattut, taama Quebec-ip ilisimatusarfiisa ilaanni, Laval universitet-imeersoq Louis-Jacques Dorais nalunaarusiamini taama allassimavoq.
Inuktitut oqaatsit tammariartussanngikkunik atorneqarluartariaqarput.
- Inuktitut oqaatsinik ukiorpaalunni oqaluttoqarnissaa qularnanngilaq, ingammik Iqaluit avataani najugaqartut inuktitut oqaluttarmata. Nunavumi naalakkersuisut malittarisassiuussinngippata sulinermi inuktitut oqaatsit atorneqartalernavianngillat, Louis-Jacques Dorais nalunaarusiamini taama allappoq.
Sumi qanorlu inuktitut tuluttullu oqaatsit atorneqartassanersut, ukiumilu 2020-imi 85 procentit inuktitut oqaluttarnissaat anguniarneqarsinnaaniassammat, inuktitut ilinniartitsisussat pikkorissartinneqarnissaat taassuma aamma siunnersuutigaa.
Inuktitut oqaatsit tammarnissaat Doraisip ernummatigigaluaraa tasamani inuusuttut ernumanngillat; ernuttatik inuktitut oqaluttassasut taakku ilimagivaat.
Utoqqaalli tamatumunnga isumaqataanngillat. Aanaq oqaluttuarpoq, meeqqani nukarliit ernuttanilu inuktitut oqaluppiarsinnaanngitsut, allappiarsinnaanngitsut atuarpiarsinnaanngitsullu eqqarsaatigalugit siunissami oqaatsimik tammarnissaat ernummatigalugu.
Louis-Jacques Dorais inuktitut sumiorpaluutinik arlalinnik kalaallisullu oqaluttartoq, Nunatsiaq Newsimi taama allaaserineqarpoq.