Quebec-imi illoqarfeerannguit ilaanni Inukjuarmi ukiut tallimat qaangiuppata diesel-imik ikummatissamik atuiunnaarluni erngup anorillu nukinganik ingerlatilimmik innaallagissiorfeqalissaaq.
Nunarsuarmi silaannaap allanngoriartornera illoqarfeerarmiut eqqarsaatigileraluttuinnarsimavaat.
- Innaallagissiorsinnaanermi aqqutissanik mingutsitsinnginnerusunik ujartuisariaqarpugut, nunaatillit peqatigiiffianni pisortaq Eric Atagotaluk oqarpoq.
Inukjuak-miut erngup silaannaallu innaallagissiutiginerani katillugu 2 megawatt-i (2 mio. watt) pilersissinnaassavaat. Illoqarfeeqqallu innaallagissamik pilersorneqarsinnaaneranut naammassaaq, innuttaasullunniit amerligaluarpata. Maannakkorpiaq Inukjuak-mi innuttaasut 1150-upput.
Canada-p sineriaani illoqarfiit allat innuttaasut 80 procentiisa najugaat anorip nukinga atorlugu innaallagissiorfiusinnaanerat ilisimatuut periarfissaqarneraraat, Nunatsiaq News allappoq.