ASSIT Inuk Silis Høegh 2015-imi kulturikkut nittarsaassisutut toqqarneqarpoq
Kulturikkut siuarsaanissamik siunnersuisoqatigiit ukioq manna kulturikkut nittarsaassisoq toqqarpaat tamatigoortuunera, pikkorilluinnartuunera suliaminullu maniguuttuunera pissutigalugit.
Kulturikkut siuarsaanissamut siunnersuisoqatigiinni siulittaasup Asii Chemnitz Narupip oqalugiarnermini kulturikkut nittarsaassisunngortoq titartakkamut Asteriximut assersuuppaa, taannaammat sorsuttartoq silatooq, qanorluunniit ajornakusoortoqartigigaluaraangat tunuarsimaarneq ajortoq.
Inuk Silis Høegh Det Kongelige Danske Kunstakademimi ilinniarsimasuuvoq aamma Tuluit Nunaanni Bristolip Universitetianit kandidatitut soraarummeersimalluni.
Filmi Sume siorna ilitsersuisuuffigigamiuk Nunatsinni ilisimaneqarlualerpoq, nunarsuarlu tamakkerlugu naliliisartunit nersualaarneqaqaluni.
- Inuk Silis Høeghip eqqumiitsuliornerminut peqatigitillugu nunatsinni ataatsimoornerulersitsisoqarsinnaanera takutippaa, nunarput kommunilu taamaalilluni pitsaasumik maluginiagassanngortillugit. Taamaattumik kulturikkut nittarsaasutut toqqarneqarnera tulluarluinnartutut isigaara, Asii Chemnitz Narup oqarpoq.
Kommuneqarfik Sermersuumi kulturikkut nittarsaassisussamik ukiut sisamassaannik maanna pisumik, toqqaasoqartarnerani angummik aatsaat toqqaasoqarpoq. Kommunip kulturikkut nittarsaassisui siulliit tassaallutik, Nivi Nielsen, Arnannguaq gerstrøm aamma Naja Rosing Asvid.